गणेशोत्सवाच्या तोंडावर पालिका कर्मचाऱ्यांच्या पगारात मोठी कपात

मुंबई: मुंबई महानगरपालिकेच्या कार्यालयात बायोमेट्रिक हजेरीत मशीनच्या बिघाडाचा फटका हा कर्मचाऱ्यांना पगाराच्या रूपात बसत आहे. मशीन सातत्याने बंद पडत असल्याने एेन गणेशोत्सवाच्या तोंडावर कामगारांच्या पगाराची मोठी रक्कम कापून घेण्यात आली आहे. त्यामुळे कर्मचाऱ्यांमध्ये तीव्र नाराजीचे वातावरण आहे. आगामी गणेशोत्सवाचा सण लक्षात घेऊनच कामगारांना पूर्ण पगार द्यावा अशी मागणी म्युनिसिपल मजदूर युनियनने केली आहे.

अनेक कामगारांचे सदोष मशीनमुळे 20 हजार ते 25 हजार रूपये कापण्यात आले आहेत. अनेक कर्मचाऱ्यांना शून्य पगार आला आहे. तर कामगारांच्या हातात पगार कापून आल्याने कामगारांमध्ये असंतोषाचे वातावरण आहे. काम करूनही सदोष बायोमेट्रिक मशीनमुळे कामगारांचे खाडे होत असतील, कामगारांचे हजारो रूपये कापले जात असतील तर अशा हजेरीची सक्ती करण्यात येऊ नये अशीही मागणी म्युनिसिपल मजदूर युनियनचे कार्याध्यक्ष अशोक जाधव यांनी केली आहे.

पूर्वीप्रमाणेच मस्टरवर हजेरी लावावी अशी मागणी त्यांनी केली आहे. बायोमेट्रिकची हजेरी ही पगाराशी जोडली जाऊ नये. प्रशासनाने यामध्ये चर्चा करून मार्ग काढावा, अन्यथा तीव्र आंदोलन करू असा इशारा म्युनिसिपल मजदूर युनियननने दिला आहे. गणपती सण घेऊन लक्षात घेऊन कामगारांना पगार द्यावा अशी मागणी युनियनचे सरचिटणीस वामन काविस्कर यांनी पालिका अतिरिक्त आयुक्त (शहर) आशिष शर्मा यांना केली आहे. ही विनंती मान्य केल्याचेही त्यांनी सांगितले.

सध्या महानगरपालिकेच्या कार्यालयात घेतल्या गेलेल्या बायोमेट्रिक मशीन या तुटपुंज्या असल्याचे युनियनचे म्हणणे आहे. 20 कामागारांच्या मागे 1 मशीन असे आदेश प्रशासनाने काढले होते, परंतु 70 ते 80 कामागारांसाठी सध्या एक मशीन उपलब्ध आहे. त्यामुळे बायोमेट्रिक मशीनवर हजेरी लावण्यासाठी कर्मचाऱ्यांची पळापळ होते. अनेकदा मशीनला इंटरनेट नसल्याने सर्व्हर कनेक्टिव्हिटीही नसते, असेही युनियनने म्हटले आहे.