अजूनही पक्षप्रमुख उद्धव ठाकरेच! बंडखोर नेत्यांच्या सूचक शुभेच्छा

शिवसेना पक्षप्रमुख आणि राज्याचे माजी मुख्यमंत्री उद्धव ठाकरे यांचा आज वाढदिवस आहे. यानिमित्ताने बंडखोरांचे नेते आणि राज्याचे मुख्यमंत्री एकनाथ शिंदे यांनीही ठाकरेंना शुभेच्छा दिल्या आहेत. मात्र त्यांनी ठाकरेंचा 'शिवसेना पक्षप्रमुख' असा उल्लेख टाळला. मात्र काही बंडखोर नेत्यांनी उद्धव ठाकरेंना शुभेच्छा देताना त्यांचा उल्लेख पक्षप्रमुख असाच केला आहे. (Uddhav Thackeray Birthday Wishes)

मुख्यमंत्री एकनाथ शिंदे (Eknath Shinde) यांनी ठाकरेंना माजी मुख्यमंत्री असं म्हणत त्यांना शुभेच्छा दिल्या. मात्र काही बंडखोर नेत्यांनी शुभेच्छा देताना ठाकरेंचा उल्लेख पक्षप्रमुख असाच केला आहे. त्यामुळे बंडखोरांचे नेते अजूनही उद्धव ठाकरेच (Uddhav Thackeray) आहेत का? शिवसेनेचे पक्षप्रमुख म्हणून अजून उद्धव ठाकरेच आहेत, असं बंडखोर नेते मानतात का असे अनेक प्रश्न उपस्थित होत आहेत.

मुख्यमंत्री एकनाथ शिंदे यांचे पुत्र आणि शिवसेना खासदार श्रीकांत शिंदे यांनीही उद्धव ठाकरेंना शुभेच्छा देताना त्यांचा उल्लेख पक्षप्रमुख असाच केला आहे. तर माजी मंत्री गुलाबराव पाटील यांनीही शिवसेना पक्षप्रमुख असाच उद्धव ठाकरेंचा उल्लेख केला आहे. मात्र एकनाथ शिंदेंनी ठाकरेंना माजी मुख्यमंत्री असं संबोधलं आहे. त्यामुळे आता शिंदे गटातही फूट पडलीये का, की शिंदे गटातल्या नेत्यांना अजूनही उद्धव ठाकरेच आपले प्रमुख वाटतात, अशा चर्चा सुरू आहेत.

दरम्यान, राज्यातला मंत्रिमंडळ विस्तार गेल्या महिनाभरापासून रखडला आहे. अशात शिंदे गटातल्या अनेक नेत्यांना मंत्रिपदाची आशा आहे. मात्र विस्तार रखडल्याने शिंदे गटात अस्वस्थता दिसून येत आहे. शिंदे-फडणवीसांचा दिल्ली दौरेही सुरू आहेत. तर शिंदे गटातले अनेक नेते सातत्याने शिंदेंच्या भेटी घेत आहेत.