Hasan Mushrif: 'मी पुन्हा निवडणूक लढवणार नाही', असं कोल्हे खासगीत म्हणाले होते, हसन मुश्रीफांचा खुलासा

उपमुख्यमंत्री अजित पवार यांनी पुणे दौऱ्यावेळी पत्रकारांशी बोलताना खासदार अमोल कोल्हेंविरोधात दंड थोपटले. त्यावेळी अजित पवारांनी अमोल कोल्हे राजीनामा देणार होते असं म्हटलं होतं. 'मी राजीनामा देतोय, मी एक कलावंत आहे, माझ्या सिनेमावर परिणाम होऊ लागला आहे, मी काढलेला एक सिनेमा शिवरायांवर असला तरी, तो चालला नाही. माझ्या एकंदरीत प्रपंचावर, आर्थिक गोष्टींवर परिणाम होतोय, अशाही गोष्टी त्यांनी येऊन सांगितलेल्या," असं अजित पवार म्हणाले होते. त्यानंतर आता अजित पवार गटाचे मंत्री हसन मुश्रीफ यांनीही अमोल कोल्हेंच्या बाबतीत काही खुलासे केले आहेत.

'मी पुन्हा निवडणूक लढवणार नाही', असं खासदार अमोल कोल्हे यांनी मला अनेकदा सांगितलं आहे. त्याच्यामुळे माझ्यावर शरद पवार आणि राष्ट्रवादीचा शिक्का बसला आहे. खासदारकीचा परिणाम माझ्या कामावर होतोय, असं ते मला अनेकदा खासगीत म्हणाले आहेत, असं मंत्री हसन मुश्रीफ यांनी माध्यमांशी बोलताना म्हटलं आहे.

तर अजित पवारांच्या वक्तव्यावर मंत्री हसन मुश्रीफ प्रतिक्रिया देताना म्हणाले की, 'अजित दादा कोणत्या तरी गोष्टीने नाराज झालेले असावेत असं मला वाटतं, त्यामुळेच ते म्हणाले असावेत'.

बच्चू कडू आणि शरद पवारांच्या भेटीवर काय म्हणाले हसन मुश्रीफ?

शरद पवार यांच्या अमरावती जिल्ह्याच्या दौऱ्याचा आजचा दुसरा दिवस आहे. शरद पवार आणि बच्चू कडू यांच्यात आज भेट झाली आहे. बच्चू कडूंनी शरद पवारांना चहाचे निमंत्रण दिल्यानंतर शरद पवार आज बच्चू कडू यांच्या निवासस्थानी गेले होते. शरद पवार आणि बच्चू कडू यांच्या होणाऱ्या भेटीमुळे राजकीय वर्तुळात विविध चर्चा रंगली आहे. तर ते महाविकास आघाडीत जाणार असल्याच्याही चर्चा सूरू होत्या, त्यावर मंत्री हसन मुश्रीफ म्हणाले, पवार साहेबांनी ही भेट राजकीय नसल्याचं आधीच सांगितलेलं आहे.