वैद्यकीय अभ्यासक्रमांच्‍या परीक्षा आता १५ जुलैपासून

नाशिक : महाराष्ट्र आरोग्‍य विज्ञान विद्यापीठातर्फे (Maharashtra University of Health Sciences) उन्‍हाळी सत्र २०२२ परीक्षांचे आयोजन दोन टप्‍यांमध्ये केले आहे. याअंतर्गत दुसऱ्या टप्‍यातील परीक्षांना १ जुलैपासून सुरुवात होणार होती. मात्र विद्यापीठातर्फे परीक्षेचे पुनर्नियोजन केले असून, सुधारीत वेळापत्रकानुसार राज्‍यभरातील परीक्षा केंद्रांवर १५ जुलैपासून परीक्षा घेतली जाणार आहे.

आरोग्‍य विद्यापीठाचे परीक्षा नियंत्रक डॉ. अजित पाठक यांच्‍या स्‍वाक्षरीचे पत्र विद्यापीठाच्‍या संकेतस्‍थळावर अपलोड करण्यात आले आहे. या परिपत्रकात परीक्षेच्‍या वेळापत्रकात बदल केले असल्‍याचे नमूद केले आहे. पदवी व पदव्‍युत्तर पदवी अशा दोन्‍ही अभ्यासक्रमांचा यात समावेश आहे. पदवी अभ्यासक्रमांतर्गत एमबीबीएस, बीडीएस, बीएएमएस, बीएचएमएस, बी.एस्सी, फिजिओथेरपी, ऑक्‍युपेशनल थेरपी आदी शिक्षणक्रमांचा समावेश आहे.

पदव्‍युत्तर पदवी अभ्यासक्रमात डॉक्‍टर ऑफ मेडिसिन (डीएम), एमडीएस, डिप्‍लोमा डेटिस्‍ट्री, आयुर्वेद, युनानी, होमिओपॅथी, डिप्‍लोमा आयुर्वेद, एम.एस्सी. नर्सिंग, फिजिओथेरेपी व एम.ए्सी.तील विविध विषयांचा समावेश आहे. याशिवाय विद्यापीठ स्‍तरावरील विविध शिक्षणक्रमांच्‍या परीक्षा या सुधारीत वेळापत्रकानुसार होतील.

असे आहेत बदल...

यापूर्वीच्‍या नियोजनानुसार दुसऱ्या टप्प्‍यातील परीक्षा १ ते २१ जुलै या दरम्‍यान पार पडणार होत्‍या. परंतु आता सुधारीत वेळापत्रकानुसार या परीक्षांना १५ जुलैपासून सुरुवात होणार असून, ४ ऑगस्‍टपर्यंत या लेखी परीक्षा राज्‍यभरातील परीक्षा केंद्रांवर पार पडतील. महाविद्यालयांनी सुधारीत वेळापत्रकाची नोंद घेत विद्यार्थ्यांना कळवावे, असे आवाहन परिपत्रकात केले आहे.