Babri Masjid : बाळासाहेब ठाकरेंप्रमाणं फडणवीसांनी तेव्हा का जबाबदारी स्वीकारली नाही : जयंत पाटील | Sakal
sakal

बोलून बातमी शोधा

Devendra Fadanvis vs Jayant Patil

'13 वर्षाच्या बालकाला घेऊन आडवाणी बाबरी मशीद पाडायला गेले का?'

'बाळासाहेब ठाकरेंप्रमाणं फडणवीसांनी तेव्हा का जबाबदारी स्वीकारली नाही'

सांगली : बाबरी मशीद (Babri Masjid) कारसेवकांनी पाडली, तेव्हा मी स्वतः त्यांच्या सोबत होतो, असं म्हणणाऱ्या देवेंद्र फडणवीसांचा (Devendra Fadnavis) जयंत पाटलांनी चांगलाच समाचार घेतलाय. राष्ट्रवादी काँग्रेसचे नेते जयंत पाटील (Jayant Patil) सांगलीत पत्रकारांशी बोलत होते. माजी मुख्यमंत्री देवेंद्र फडणवीस हे बाबरीपतनावेळी त्याठिकाणी होते, असा दावा करीत असतील तर त्यांनी शिवसेनाप्रमुख बाळासाहेब ठाकरेंप्रमाणे तेव्हा जबाबदारी का स्वीकारली नाही, असा सवाल जलसंपदामंत्री पाटील यांनी उपस्थित केलाय.

जयंत पाटील म्हणाले, बाबरी मशीद पडली तेव्हा फडणवीसांचं वय काय होतं? त्यावेळी 13 वर्षाच्या बालकाला घेऊन आडवाणी बाबरी मशीद पाडायला गेले का? तसं असेल तर आडवाणींनी बालकाचे प्राण धोक्यात घातले म्हणून त्यांच्यावरही केस होईल. हे प्रकरण गंभीर आहे, अशी टीकाही त्यांनी केलीय. फडणवीस माझे चांगले मित्र आहेत. त्यांनी त्यांच्या बऱ्याच गोष्टी मला सांगितल्या, पण आजवर बाबरीपतनात ते सहभागी असल्याचं कधीच सांगितलं नाही. इतकी वर्षे त्यांनी ही गोष्ट माझ्यापासून का लपविली, असा प्रश्न मला पडलाय. बाळासाहेब ठाकरेंनी (Balasaheb Thackeray) लगेच बाबरीपतनाची जबाबदारी स्वीकारली होती. त्यावेळी फडणवीस यांनी जबाबदारी का स्वीकारली नाही? कारसेवकांबरोबर सहभागाचा तो किस्सा सविस्तर सांगण्याची विनंती मी फडणवीस यांना भेटीवेळी करेन. त्यांनी सर्व घटनाक्रम मला व्यवस्थित सांगावा, अशी इच्छा असल्याचंही त्यांनी नमूद केलंय.

हेही वाचा: सरकारनं संवैधानिक जबाबदारीचं पालन केलंय; राज ठाकरेंच्या कारवाईवर काँग्रेसची प्रतिक्रिया

धार्मिक राजकारणावर पाटील म्हणाले, 'मार्क्सनं म्हटल्याप्रमाणे धर्म ही अफूची गोळी आहे. हीच गोळी सर्वसामान्य जनतेला देऊन त्यांना महागाईच्या प्रश्नापासून अलिप्त ठेवायचा प्रयत्न केंद्र सरकार करत आहे. धार्मिक वाद निर्माण करण्यासाठी मोदी सरकार काही बुजगावण्यांना पुढं करीत आहे. सरकार चालविण्यामधील अपयश लपविण्यासाठी त्यांचा हा केविलवाणा प्रयत्न आहे. सामान्य माणूस अशा गोष्टींना बळी पडणार नाही, याची आम्हाला खात्री वाटते.' दरम्यान, मुंबईतील सोमय्या ग्राउंडवर महाराष्ट्रदिनी भाजपनं घेतलेल्या बूस्टर सभेत देवेंद्र फडणवीस यांनी बाबरी मशिद पाडताना शिवसैनिक तिथे नव्हते, असं वक्तव्य केलं. त्यानंतर शिवसेनेच्या नेत्यांकडून संतापजनक प्रतिक्रिया येत आहेत. राष्ट्रवादी काँग्रेस नेते जयंत पाटील यांनीदेखील आज फडणवीसांवर उपरोधिक टीका केलीय.

Web Title: Jayant Patil Criticizes Devendra Fadnavis Over Babri Masjid Case At Sangli

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top