प्रभाकर साईल खोटारडा; किरण गोसावीचा व्हिडिओ आला समोर

आर्यन खान ड्रग्ज प्रकरणात पंच म्हणून उपस्थित असलेल्या किरण गोसावीला पुणे पोलिसांनी ताब्यात घेतलं आहे. दरम्यान, त्याचा एक व्हिडिओ व्हायरल होत आहे. त्याचा अंगरक्षक प्रभाकर साईलने केलेले आरोप किरण गोसावीने फेटाळून लावले आहेत. तसंच प्रभाकर साइल हा खोटं बोलत असल्याचंही या व्हिडिओमध्ये किरण गोसावीने म्हटलं आहे.

प्रभाकर साईलने सॅम डिसोजासोबत संभाषण कोणाचे झाले, किती पैसे कोणाचे घेतले आहेत, प्रभाकरला गेल्या पाच दिवसात कोणाच्या ऑफर आल्या आहेत, त्याच्या मोबाइलवरून स्पष्ट समजेल. त्याच्या दोन्ही भावाचेही मोबाईल डिटेल्स काढा. माझे आणि प्रभाकरचेसुद्धा चॅट तपासून पाहा असंही गोसावीने या व्हिडिओमध्ये म्हटलं आहे.

मुंबई पोलिसांनी केस हातात घेतल्यास सगळ्यात आधी याची माहिती काढावी. मंत्री किंवा नेते याच्या मागे आहेत. मी मराठी माणूस आहे आणि किमान एका तरी मंत्र्याने किंवा विरोधी पक्षातील नेत्याने माझ्या मागे उभा रहावं. माझ्यावतीने मुंबई पोलिसांकडे तपासासाठी विनंती करावी असंही किरण गोसावी यावेळी म्हणाला.

प्रभाकर साइलचे सीडीआर रिपोर्ट काढावेत. त्याचे २ ऑक्टोबरपासूनचे कॉल डिटेल्स, चॅट तपासावेत. म्हणजे त्याच्या मागे कोण मंत्री आहेत ते समोर येईल. त्याला काय ऑफर आल्या आहेत याचीही माहिती समजेल असं किरण गोसावीने म्हटलं आहे. त्याचे चॅट समोर आल्यास सर्व काही समजेल असंही गोसावी म्हणाला.

किमान एक मंत्री किंवा विरोधी पक्षा नेत्याने माझ्या पाठिशी उभा रहावं. ते नसेल तर किमान मुंबई पोलिसांना विनंती करावी की प्रभाकर साईलचे सीडीआर रिपोर्ट आणि चॅट्स डिटेल्स काढावेत. त्याचे रिपोर्ट येताच समजेल कोणाकडून किती ऑफर आणि कुणाला आहे? असेही किरण गोसावीने म्हटलं आहे.