KDCC Result :शिरोळात राजेंद्र पाटील-यड्रावकरच ‘किंग’

कोल्हापूर : जिल्हा बँकेच्या निवडणुकीत दोन साखर सम्राटांतील लढतीने लक्षवेधी ठरलेल्या शिरोळ तालुका विकास संस्था गटात राज्यमंत्री राजेंद्र पाटील-यड्रावकर (Rajendra Patil Yadravkar)यांनी ९८ मते घेत या तालुक्यात आपण ‘किंग’ असल्याचे दाखवून दिले. या गटातून त्यांच्या विरोधात ‘दत्त-शिरोळ’ चे अध्यक्ष गणपतराव पाटील (Ganapatrao Patil)होते, त्यांना अवघी ५१ मते मिळाली.

या गटात श्री. पाटील यांच्या बाजूने स्वाभिमानी शेतकरी संघटनेचे अध्यक्ष माजी खासदार राजू शेट्टी (Raju Shetti) यांनी स्वतः रिंगणात उतरून ताकद लावली होती. एवढेच नव्हे तर मतदान केंद्रावर पाटील यांचे मतदान प्रतिनिधी म्हणूनही ते स्वतः दिवसभर बसून होते. या दोघांबरोबरच शेट्टी यांचीही या गटात प्रतिष्ठा पणाला लागली होती, त्यात अखेर यड्रावकर यांनी बाजी मारली.