सांगली : मुलं पळवणारी टोळी समजून साधूंना मारहाण केल्याप्रकरणी ६ जणांना अटक

सांगली : मुलं पळवणारी टोळी समजून साधूंना मारहाण करणाऱ्या ६ जणांना अटक करण्यात आली आहे. लवंगा गावातील ग्रामस्थांकडून काल या साधूंना मारहाण केली होती. यानंतर पोलिसांनी घटनास्थळी धाव घेत मारहाण झालेल्या साधूंना रुग्णालयात दाखल केलं होतं. सांगली पोलिसांनी ही माहिती दिली. (Maharashtra 6 arrested for thrashing monks in Sangli village)

सांगलीचे पोलीस अधीक्षक गेडाम म्हणाले, पोलिसांनी स्वतःहून दखल घेत या साधूंना मारहाण करणाऱ्या ६ जणांना अटक केली आहे. या प्रकरणाची चौकशी लवकरच सुरु होईल, तसेच आणखी काही आरोपींना लवकरच अटक केली जाईल. मारहाण झालेल्या साधुंनी याप्रकरणी स्वतःहून पोलिसांत तक्रार दाखल केलेली नाही. पण व्हायरल व्हिडिओच्या माध्यमातून पोलिसांनी ही कारवाई केल्याचं पोलीस अधीक्षकांनी सांगितलं.

उत्तर प्रदेशातील काही साधू हे पंढरपूरला विठ्ठलाच्या दर्शनासाठी गेले होते. पंढरपूरहून निघाल्यानंतर ते कर्नाटकच्या बिजापूर इथं जाण्यासाठी निघाले होते. दरम्यान, सांगलीत पोहोचल्यानंतर त्यांनी काही लहान मुलांकडे मदत मागितली. पण ही मुलं पळवणारी टोळी समजून स्थानिकांनी या साधूंना मारहाण केली. या घटनेचा व्हिडिओ सोशल मीडियात व्हायरल झाला.

दरम्यान, मारहाण झालेले साधू हे मथुरेतील पंच दर्शन जुना आखाड्यातील साधू आहेत. ते कायम विविध धार्मिक स्थळी भेट देत असतात.