मुंबईतून आणखी एक संशयीत दहशतवाद्याला अटक

महाराष्ट्र एटीएस आणि मुंबई पोलिस गुन्हे शाखेच्या पथकाने मुंबईतून मध्यरात्री उशीरा आणखी एक संशयीत दहशतवाद्याला अटक केली आहे. जाकीर असं या संशयीत दहशतवाद्याचं नाव आहे. जोगेश्वरी येथून रात्री उशीरा त्याला ताब्यात घेण्यात आलं होतं. त्यानंतर त्याला नागपाडा एटीएस कार्यालयात चौकशीसाठी आणलं होतं. चौकशीनंतर त्याला अज्ञात स्थळी हलवण्यात आल्याचं वृत्त आहे. गेल्या आठवड्यात दिल्ली पोलिसांच्या विशेष पथकाने मुंबईसह देशभरातून सहा दहशतवाद्यांना अटक केली होती. महाराष्ट्रासह सहा राज्यात साखळी बॉम्बस्फोटाचा कट रचणार असल्याची धक्कादायक माहिती तपासातून उघड झाली होती. यामध्ये मुंबईत सायन-भागात राहाणाऱ्या जान मंहम्मद या दहशतवाद्याचा समावेश होता.

सायनच्या जान मंहम्मद आणि जाकीर यांच्यात काही कनेक्शन आहे का? याचा तपास मुंबई पोलिस गुन्हे शाखा आणि महाराष्ट्र एटीएस घेत असल्याचं वृत्त आहे.

तीन दिवसांपूर्वी जान मोहम्मद शेखसह इतर पाच दहशतवाद्यांना दिल्ली पोलिसांनी अटक केली होती. एकाच वेळेस महाराष्ट्र, दिल्ली आणि उत्तर प्रदेशात ही कारवाई करण्यात आली होती. जान मोहम्मद हा गेल्या २० वर्षांपासून दाऊद इब्राहिम टोळीशी संबंधित होता. सध्या तो अनिस इब्राहिमच्या संपर्कात होता. दिल्ली पोलिसांच्या तपासात ही बाब उघडकीस आल्याने त्याची महाराष्ट्र एटीएसने गंभीर दखल घेत आता त्यांचा स्वतंत्र तपास सुरू केला होता. त्यामध्येच आता आणखी एका दहशदवाद्याला ताब्यात घेतलं आहे.