‘आयडीएसएससी’ स्पर्धेत राज्याचा डंका

पुणे : राष्ट्रीय छात्र सेनेच्या महाराष्ट्र संचालनालयाने महू येथे झालेल्या ‘इंटर डायरेक्टोरेट फायरिंग स्पर्धे’मध्ये (आयडीएसएससी) ९५३७ गुण मिळवत प्रथम क्रमांक पटकावला आहे. यात देशातील १७ एनसीसी संचालनालयातील एकूण १७० एनसीसी कॅडेट्सने सहभाग घेतला होता. तब्बल चार वर्षानंतर महाराष्ट्र संचालनालय पुन्हा राष्ट्रीय स्तरावर प्रथम आला आहे. विजेते ठरलेल्या महाराष्ट्र संचालनालयाच्या एनसीसी गटात सहा मुले व चार मुली असे एकूण दहा कॅडेट्सचा समावेश होता. त्यातील नऊ कॅडेट्स हे पुण्याचे तर एक कॅडेट मुंबई एनसीसी ‘ब’ ग्रुपचा आहे.  

या स्पर्धेसाठी महाराष्ट्र संचालनालयाच्या वतीने पुणे एनसीसी ग्रुप कमांडर ब्रिगेडियर आर के गायकवाड यांनी कॅडेट्सची निवड आणि प्रशिक्षणाची जबाबदारी पार पाडली. तसेच पुणे एनसीसी मुख्यालयातील ३६ महाराष्ट्र बटालियनचे कर्नल सतीश शिंदे आणि कर्नल ॲलेक्स मोहन व प्रशिक्षकांच्या मार्गदर्शनाखाली या एनसीसी कॅडेट्सने बालेवाडी येथे प्रशिक्षण घेतले. तर आयडीएसएससी स्पर्धा २५ ते ३० सप्टेंबरला पार पडली.

यात देशातील १७० एनसीसी कॅडेट्सने सहभाग घेतला होता. या पूर्वी २०१७ मध्ये एनसीसीच्या महाराष्ट्र संचालनालयाने या स्पर्धेत विजेते पद पटकावले होते. त्यानंतर २०१८ आणि २०१९ दरम्यान दुसऱ्या क्रमांकवर समाधान मानावे लागले. यंदा पश्‍चिम बंगाल एनसीसी संचालनालयाला ५२९ गुणांनी मागे टाकत महाराष्ट्र संचालनालयाने पहिले क्रमांक मिळविले आहे.

महाराष्ट्र संचालनालयाच्या दहा पैकी नऊ कॅडेट्सची निवड ‘डीजीएनसीसी’मध्ये निवड झाली आहे. तर हे निवडलेले कॅडेट्स येत्या ११ ऑक्टोबर रोजी अहमदाबाद येथे ‘ऑल इंडिया जी व्ही मावळणकर शूटिंग चॅम्पयनशिप’मध्ये (एआयजीव्हीएमएससी) डीजीएनसीसी संघाचे प्रतिनिधित्व करतील.