छत्रपती संभाजीनगर जिल्ह्यातील सिल्लोड आगारातील सहायक वाहतूक निरीक्षक शरद विठ्ठल भिवसने यांनी वरिष्ठांच्या कथित जाचाला कंटाळून विहिरीत उडी घेऊन आत्महत्या केल्याची धक्कादायक घटना समोर आली आहे. या प्रकरणी सिल्लोड शहर पोलिसांनी डेपो व्यवस्थापक विजय काळवणे, वाहतूक निरीक्षक किरण अवसरमल आणि लिपिक विकास चव्हाण यांच्याविरुद्ध आत्महत्येस प्रवृत्त करणे आणि अत्याचार प्रतिबंधक कायद्यान्वये गुन्हा दाखल केला आहे. घटनेची माहिती मिळताच कर्मचारी आणि नातेवाईक आक्रमक झाले असून दोषींवर कारवाई होईपर्यंत मृतदेह ताब्यात न घेण्याची भूमिका घेतल्याने पोलिस ठाण्यात मोठी गर्दी झाली. सहकाऱ्याच्या निधनाने संतप्त झालेल्या कर्मचाऱ्यांनी सिल्लोड आगारातील बससेवा बंद पाडली असून ग्रामीण भागातील वीस बस फेऱ्या ठप्प झाल्या. तक्रारीनुसार संबंधित अधिकाऱ्यांकडून सतत मानसिक छळ, जातीवाचक शिवीगाळ आणि बाहेर ड्युटीची धमकी दिली जात होती, या त्रासाला कंटाळून त्यांनी टोकाचे पाऊल उचलल्याचे नमूद करण्यात आले आहे.
