जनताच करेल सत्ता बरखास्त - शरद पवार

मुंबई : ‘‘सत्ता केंद्रित करणे हे पक्षाला ताकद देण्याचा प्रयत्न असू शकतो. परंतु अशा सत्तेविरोधात जनता बोलत नाही, ती बघत असते, निरीक्षण करत असते. आज देशातील अनेक राज्यातील सरकार बरखास्त करण्याचा प्रयत्न होत आहे. त्यामुळे आज ना उद्या ही सत्ता बरखास्त केल्याशिवाय जनता राहणार नाही,’’ असा इशारा राष्ट्रवादी काँग्रेसचे राष्ट्रीय अध्यक्ष शरद पवार यांनी कार्यकर्त्यांना मार्गदर्शन करताना भाजपला दिला. राष्ट्रवादी काँग्रेसची राज्य कार्यकारिणीची बैठक यशवंतराव चव्हाण प्रतिष्ठान येथे मंगळवारी पार पडली. विरोधातील अडीच वर्ष लोकांच्या अडीअडचणीला धावून जाण्याचे आवाहन शरद पवार यांनी कार्यकर्त्यांना केले.

‘‘आज ज्या घडामोडी घडत आहेत त्यामध्ये शिवसैनिक कुठे हलला नाही. ज्यांनी सत्ता बदल करण्याचा प्रयत्न केला त्यांच्याविरोधात हा शिवसैनिक एकत्र झाला आहे. एखाद दुसरा सोडला तर एकही निवडून येणार नाही हे मला शिवसैनिक सांगत आहेत. महाराष्ट्रात नुकतेच जे सत्तापरिवर्तन झाले ते लोकांना आवडलेले नाही. शिवसैनिक नाराज आहेत त्यामुळे एक वेगळे चित्र राज्यात आगामी काळात पाहायला मिळेल,’’ असेही शरद पवार म्हणाले.

यश मिळवायचे आहे - अजित पवार

‘‘आपल्याला यश मिळवायचे आहे. आता सरकार नाही. महागाई, बेरोजगारी वाढत आहे. याविरोधात आपल्या महिला आंदोलन करत आहेत. तशाच पद्धतीने त्या - त्या भागातही आंदोलन करायला हवे. राज्यात कुठल्याही निवडणुका जाहीर झाल्या की आपण तयार असले पाहिजे.भाजपचा पराभव करायचा असेल तिथे एकत्र आले पाहिजे, असे अावाहन विरोधी पक्षनेते अजित पवार यांनी केले.