Corona Update : राज्यात दिवसभरात 2962 नव्या कोरोना रुग्णांची नोंद

मुंबई : राज्यात आज २,९६२ नवीन कोरोनाची लागण झालेल्या रुग्णांची संख्या नोंदवली गेली; त्यामुळे महाराष्ट्रात कोरोनाच्या सक्रिय रुग्णांची संख्या आता २२,४८५ वर पोहचली आहे. तसेच मुंबईतील एका ६० वर्षीय महिलेला राज्यात BA.4 व्हेरिएंटची लागण झाल्याचे समोर आले आहे. या महिलेचे पूर्णपणे लसीकरण झाले आहे आणि त्यांच्यामध्ये सौम्य लक्षणे आढळून आली आहेत. यासोबतच राज्यातील BA.4 आणि BA.5 रुग्णांची एकूण संख्या ६४ वर पोहोचली आहे. मुंबईत सध्या ७,६७१ सक्रिय रुग्ण आहेत.

दरम्यान राज्यात आज तब्बल ३,९१८ रुग्ण बरे होऊन घरी परतले आहेत. राज्याचा रिकव्हरी रेट हा ९७.८७ टक्के इतका राहीला आहे. राज्यात आज २,९६२ नवे रुग्ण आढळले तर तब्बल ६ रुग्णांना कोरोनामुळे जीव गमवावा लागला, त्यामुळे राज्यातील मृत्यूदर हा १.८५ टक्के इतका झाला. तर आतापर्यंत राज्यामध्ये ७८,१४,८७१ कोरोनाबाधित बरे होऊन घरी परतले आहेत. त्यामुळे कोरोना रुग्ण बरे होण्याचं प्रमाण ९७.८२ टक्के इतकं झालं आहे.

दरम्यान देशात देखील कोरोना रुग्णांचा आकडा वाढताना दिसत आहे. गेल्या २४ तासांत देशात १६ हजारहून अधिक नवीन कोरोना रुग्णांची नोंद झाली. तसेत सक्रिय रुग्णांची संख्याही एक लाखांच्या पुढे गेली आहे. देशात शनिवारी दिवसभरात १६ हजार १०३ नवीन कोरोनाबाधितांची नोंद झाली आहे.