Corona : राज्यात आजही कोरोना चार हजार पार; मुंबईकारांनी चिंता वाढवली

मुंबई : राज्यात सलग तीन दिवसांपासून नव्या कोरोना बाधितांची संख्या चार हजारांच्यावर आहे. त्यामुळे नागरिकांची चिंता वाढली आहे. तर, दुसरीकडे गेल्या 24 तासांत राज्यात 4,165 नव्या कोरोना बाधितांची नोंद करण्यात आली असून, एकट्या मुंबईत 2,255 रूग्णांची भर पडली आहे. त्यामुळे मुंबईकरांच्या चिंतेत भर पडली आहे. राज्यात आज 3047 रुग्णांनी कोरोनावर मात केली असून 24 तासांत कोरोनामुळं तीन जणांचा मृत्यू झाला आहे. (Maharashtra Corona Update)

राज्यातील रूग्ण बरे होण्याचे प्रमाण 97. 86 टक्क्यांवर नोंदवण्यात आले असून, मृत्यूदर 1.86 टक्के इतका झाला आहे. सध्या राज्यात 21,749 कोरोनाच्या सक्रिय रूग्ण असून, मुंबईत सर्वाधिक म्हणजे 13,304 इतक्या सक्रिय रुग्णांची नोंद करण्यात आली आहे. त्या खालेखाल ठाण्यात 4,442 इतके सक्रिय रुग्ण आहेत.

तर देशात गेल्या 24 तासांत 12 हजार 847 नव्या कोरोना रुग्णांची नोंद करण्यात आली असून, 14 जणांचा कोरोनामुळे मृत्यू झाला आहे. तर, 7 हजार 985 रुग्णांनी कोरोनावर मात केली आहे.