राज्यात दिवसभरात ४४ हजारांहून अधिक रुग्ण

मुंबई: राज्यात गेल्या काही दिवसांपासून कोरोनाची रुग्णसंख्या वाढत आहे. या पार्श्वभूमीवर राज्य सरकारने काही निर्बंधही लागू केले आहेत. कोरोनाची तिसरी लाट आल्याचं तज्ज्ञांचं म्हणणं आहे. राज्यात दररोज ओमिक्रॉनचे नवीन रूग्ण मोठ्या प्रमाणावर आढळून येत आहेत. आज राज्यात दिवसभरात ४४ हजार ३८८ नवीन करोनाबाधित तर २०७ ओमिक्रॉन बाधित आढळले आहेत. शिवाय, राज्यात आज दिवसभरात १२ करोनाबाधित रूग्णांचा मृत्यू देखील झाला आहे.

राज्यात आज दिवसभरात १५ हजार ३५१ रूग्ण कोरोनामुक्त झाले आहेत. सध्या, राज्यातील अॅक्टिव्ह केसेसची संख्या २,०२,२५९ आहे. कोरोना महासाथ सुरु झाल्यापासून आजपर्यंत राज्यात १, ४१, ६३९ करोनाबाधित रूग्णांचा मृत्यू झालेला आहे. राज्यात आजपर्यंत आढळलेल्या ओमायक्रॉन बाधितांची संख्या १ हजार २१६ झालेली आहे. या पैकी ४५४ जणांची आरटीपीसीआर चाचणी निगेटिव्ह आल्याने त्यांना डिस्चार्ज मिळालेला आहे. आजपर्यंत राज्यात ६५,७२,४३२ रूग्ण करोनातून बरे होऊ घरी परतले आहेत. सध्या राज्यातील रूग्ण बरे होण्याचे प्रमाण म्हणजेच रिकव्हरी रेट ९४.९८ टक्के आहे. तर, मृत्यू दर २.०४ टक्के आहे.