शरद पवारांवर टीका करणाऱ्यांच्या बुध्दीची किव येते; NCP आमदाराची 'या' आमदारावर सडकून टीका | Sakal
sakal

बोलून बातमी शोधा

Sharad Pawar-Shashikant Shinde

'शरद पवारांना बदनाम करण्याचं पाप आपण करत आहात.'

'शरद पवारांवर टीका करणाऱ्यांच्या बुध्दीची किव येते'

विसापूर : रयत शिक्षण संस्थेची (Rayat Shikshan Sanstha Satara) कार्यप्रणाली आणि देश पातळीवरील जाणते नेतृत्व म्हणून नावलौकिक असणाऱ्या शरद पवार (Sharad Pawar) यांचं कार्य जनतेला चांगलंच माहित आहे. मात्र, स्वतःची पोळी भाजून घेण्यासाठी काही जण रयत शिक्षण संस्था आणि पवार साहेबांवर टीका करत आहेत. आपली उंची किती, आपण कुणावर आणि किती बोलतो, याची जाण नसणाऱ्यांच्या बुध्दीची किव येत असल्याचा प्रतिटोला आमदार शशिकांत शिंदे (Shashikant Shinde) यांनी लगावला.

हेही वाचा: निवडणुकीत दोन माजी आमदारांचा 'करेक्ट कार्यक्रम'; काँग्रेसचं वर्चस्व वाढलं

पुसेगाव येथे पत्रकार परिषदेत त्यांनी ही टीका केली. अपघाताने निवडून येवून आमदार झालेल्यांच्या डोक्यात हवा गेली आहे. शरद पवार आणि ‘रयत’वर टीका करणाऱ्यांच्या बालिश बुध्दीचा प्रत्यय येतो. आपली उंची किती, पात्रता किती आणि पवार साहेबांचे कार्य आणि उंची किती, त्यांचे राज्यातील आणि देशातील योगदान किती, आपण कधी एखादी संस्था चालविली आहे का, अशी प्रश्नांची मालिकाच शशिकांत शिंदे यांनी उपस्थित केली. ते म्हणाले, ‘‘आजच्या स्पर्धेच्या युगात कर्मवीरांच्या पश्चात आधुनिक शिक्षण प्रणाली सर्वसामान्य विद्यार्थ्यांपर्यंत पोहचविण्यासाठी पवार साहेबांनी दूरदृष्टीने अनेक निर्णय घेऊन त्याची अंमलबजावणी केली. पवार साहेबांकडे अध्यक्षपद आल्यावर ‘रयत’ची जबाबदारी त्यांनी उत्कृष्टपणे सांभाळली आहे. कोरोना काळात १५ ते २० कोटींचा निधी उपलब्ध करुन संस्थेच्या सर्व शाळांमध्ये संगणक आणि इतर आधुनिक शिक्षण साधने उपलब्ध करुन दिली आहेत.’’

हेही वाचा: भारताच्या 'या' उदारतेवर तालिबान खूश; अफगाणिस्तानचा 'आनंद' गगनात मावेना

आत्ता जिल्हा बॅंकेत संचालक झालेल्या त्यांच्याच सहकाऱ्याकडूनही त्यांनी माहिती घ्यावी. सध्याच्या स्पर्धात्मक युगात ‘रयत’ला उभारी दिली, कोट्यावधींचे अनुदान आणि निधी दिला असताना आपण संस्थेत भ्रष्टाचार झाला, नोकरीसाठी पैसे घेतले जातात असे म्हणता, बारामतीचे लोक संस्थेत घेतले जातात असे सांगता, हे चुकीचे आहे, असेही त्यांनी नमूद केले. एका तक्रारीवरुन पवार साहेबांनी वरिष्ठ पदाधिकाऱ्यावर कारवाई केली. ‘रयत’चा परिवार ज्या नेतृत्वाने राज्याच्या कानाकोपऱ्यात पोहचविला. त्यांच्या कार्याचे मोजपाप करण्याची आपली उंची नाही, अशी टीकाही शशिकांत शिंदेंनी केली. बारामतीच्या विद्याप्रतिष्ठानमध्ये जिल्ह्यासह राज्यातील अनेक विद्यार्थी उच्च शिक्षण घेण्यासाठी जातात. अनेक अनाथ विद्यार्थ्यांची जबाबदारी तेथे घेतली जाते. राष्ट्रवादी वेलफेअर फंड, यशवंतराव चव्हाण प्रतिष्ठानमार्फत अनेक विद्यार्थ्याची जबाबदारी घेतली जाते, अशी माहितीही त्यांनी दिली.

हेही वाचा: ..म्हणून संभाजीराजे गोरगरीब जनतेला भावतात

ज्यांनी रयत शिक्षण संस्थेला देव मानले, ज्यांनी या संस्थेच्या माध्यमातून शिक्षण प्रसाराचे कार्य केले. त्यांना आणि संस्थेला बदनाम करण्याचे पाप आपण करत आहात. चांगल्या चाललेल्या संस्थेवर टीका करुन आपण आपली पोळी भाजण्याचा प्रयत्न करत आहात, याची किव येते.

- शशिकांत शिंदे, आमदार

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top