'मी पवार साहेबांचा चेला हाय, त्यांचा आदेश घेऊनच राजकारणात आलोय'

बिजवडी (सातारा) : विरोधक जेव्हा मतदारसंघात आले तेव्हा त्यांनी जिल्हा परिषद निवडणुकीपासून (Zilla Parishad Election) ते आतापर्यंत पैशांचा, गुंडगिरीचा वापर करत माणचं राजकारण नासवण्याचं काम केलेय. जनाधार कमी झाला की पैसे वापरायचे अन् निवडणुका जिंकायच्या. जिल्हा बँक निवडणुकीतही District Bank Election (कै.) सदाशिवराव पोळ यांच्या कट्टर समर्थकांना पैसे देऊन फोडण्याचे काम केले. हे लोक निर्ढावलेली आहेत. त्यांना दहिवडी, वडूज, बिजवडीसारखी इतर निवडणुकाही जागा दाखवून देणे गरजेचे असल्याचे आवाहन राष्ट्रवादीचे नेते प्रभाकर देशमुख (Prabhakar Deshmukh) यांनी केले.

येळेवाडी (पिंपराळे) (ता. माण) येथे बिजवडी सोसायटीच्या नूतन संचालकांच्या सत्कार समारंभात ते बोलत होते. या वेळी मनोज पोळ, नगराध्यक्ष सागर पोळ, उपनगराध्यक्ष राजेंद्र साळुंखे, तानाजी कट्टे, काँग्रेसचे जिल्हा उपाध्यक्ष एम. के. भोसले, शिवसेनेचे उपजिल्हाप्रमुख संजय भोसले, सुनील पोळ, बाळासाहेब सावंत, शिवाजीराव महानवर, बाबूराव काटकर उपस्थित होते. देशमुख म्हणाले, ‘‘लोकप्रतिनिधी हे ताम्रपट घेऊन आल्यासारखे आतापर्यंतची १५ वर्षे अन् पुढचीही १५ वर्षे मीच आमदार राहीन, अशा अहंकारी वल्गना करत आहेत. रावणालाही मोठा अहंकार होता. शेवटी त्यांचे काय झाले. मी म्हणजेच सरकार, माझेच सरकार म्हणणाऱ्या लोकप्रतिनिधींनी सरकार कोणा एकट्याच नसतं, सरकार जनतेचं असतं, हे लक्षात घ्यावं. विधानसभा निवडणुकीदरम्यान जिहे- कटापूरचे पाणी किती दिवसांत आणणार होता. कुठे गेल्या त्या वल्गना, किती दिवस लोकांना फसवताय, पाइपलाइन पूजनाच काय झालं, जादा पाण्याच रिझर्वेशन घेतलंय का, टेंभूचे पाणी इकडे का आलं नाही, सांगलीत पाणी जाताना आपण का गप्प होता याची उत्तरे द्या.

पवार (Sharad Pawar) साहेबांवरती बोलणाऱ्यांकडे पात्रता हवी. साहेब काय करतात ते भल्याभल्यांना समजत नाही. मी साहेबांचा चेला असून, त्यांचा आदेश घेऊनच मी राजकारणात आलोय. यश-अपयश आले तरी आपण थांबणार नाही. वैयक्तिक टीका करण्यात वेळ घालवण्यापेक्षा विरोधकांनीही विकासाच राजकारण करावे. एमआयडीसीचे खरे श्रेय माणचे दोन सुपुत्र एमआयडीसीचे माजी अधिकारी अविनाश सुभेदार अन मलिकनेर साहेबांना दिले पाहिजे. उपमुख्यमंत्री अजित पवार (Ajit Pawar) यांनी ही एमआयडीसी कुठेही जाणार नाही. काळजी करू नका, असे सांगितले आहे.’’ फलटणकरांवर बोलणारे जिल्हा बँक निवडणुकीवेळी तिथं जाऊन का शरण आले, बँकेतून का माघार घेतली, तिथं नेमकी काय सेटलमेंट करत तोड केली, हे एकदा जाहीर करा, अशी टीकाही त्यांनी केली. एम. के. भोसले, शिवसेना उपजिल्हाप्रमुख संजय भोसलेंनी मनोगत व्यक्त केले. विजय बरकडे यांनी सूत्रसंचालन केले. पांडुरंग भोसले यांनी आभार मानले.

विकासावर बोलण्यापेक्षा वैयक्तिक टीका करत लोकप्रतिनिधी माझी पातळी काढत आहेत. माझी पातळी पंतप्रधान नरेंद्र मोदी व माजी पंतप्रधान मनमोहन सिंग यांनी पुरस्कार देऊन ठरवलीय. दोन्हीही तुमचेच वरिष्ठ नेते आहेत. त्यामुळे तुम्ही माझी पातळी ठरवू नका. तुम्ही त्यांच्यापेक्षा मोठे नाहीत.

- प्रभाकर देशमुख, नेते, राष्ट्रवादी कॉँग्रेस