अँजिओग्राफी करुन मला मारुन टाकण्याचा कट होता; नितेश राणेंचा गंभीर आरोप

मुंबई : राज्यात गेल्या काही दिवसांपासून सत्ताधारी आणि विरोधकांमध्ये टोकाचा संघर्ष सुरु आहे. त्यातच राणे परिवार आणि शिवसेनेतील (Shivsena) संघर्ष संपण्याचं नाव घेत नाहीये. त्यातच आता आमदार नितेश राणेंनी (Nitesh Rane) पुन्हा एक गंभीर आरोप केला आहे. शिवसैनिक संतोष परब यांच्यावरील हल्ल्याप्रकरणी भाजप (BJP) आमदार नितेश राणे यांच्या न्यायालयीन कोठडी दरम्यान, त्यांना रुग्णालयात हलवण्यात आलेलं होतं. त्यावेळी आपल्याला मारून टाकण्याचा कट रचला गेला होता असा आरोप नितेश राणेंनी केला आहे.

सिंधुदुर्ग जिल्हा बँकेच्या निवडणुकीदरम्यान मला एका प्रकरणात अडकवण्यात आलं. यावेळी आपल्याला पोलीस आणि प्रशासनाचा जो अनुभव आला तो थक्क करणारा होता असं नितेश राणेंनी विधानभवनात सांगितलं. "आपल्याला रुग्णालयात दाखल करण्यात आल्यानंतर डॉक्टरांनी अंजिओग्राफी करण्यासाठी आग्रह केला. माझा रक्तदाब कमी झालेला होता, मला ते जाणवत होतं, मात्र तरीही डॉक्टर ऐकण्यास तयार नव्हते. मात्र काही आमच्या ओळखीच्या लोकांनी सांगितलं की, अँजिओग्राफीच्या निमित्ताने तुमच्या शरिरात इंक टाकून तुम्हाला मारण्याचा प्रयत्न आहे. तुम्ही अँजिओग्राफी करू नका." असे गंभीर आरोप नितेश राणेंनी केले.