पत्रिकेवर नाव नसलं, तरी देवेंद्रंचं नाव जनतेच्या मनात कायम : दरेकर

मुंबई : सिंधुदुर्गातील चिपी विमानतळाचे (Sindhudurg chipi Airport) उद्घाटन आज 9 ऑक्टोबर रोजी होत आहे. मात्र, या विमानतळाच्या उद्घाटनाच्या कार्यक्रमाचं निमंत्रण विधानसभेचे विरोधी पक्षनेते देवेंद्र फडणवीस (Devendra Fadnavis) आणि विधान परिषदेचे विरोधी पक्षनेते प्रवीण दरेकर (Pravin Darekar) या दोघांनाही अद्याप मिळालेलं नाही. प्रवीण दरेकर यांनी स्वत: याबाबतची माहिती दिलीय. त्यामुळे भाजप या उद्घाटनाच्या कार्यक्रमावर बहिष्कार टाकणार असल्याची माहिती स्वत: प्रवीण दरेकर यांनी दिली. या लोकार्पण सोहळ्याच्या निमंत्रण पत्रिकेत केंद्रीय मंत्री नारायण राणे यांचं नाव तिसऱ्या नंबरला असल्यामुळे पत्रकार परिषदेत त्यांनी ही नाराजी व्यक्त केली.

दरेकर पुढे म्हणाले, देवेंद्र फडणवीस यांचं विमानतळाच्या बांधकामात मोठं योगदान असतानाही त्यांचं पत्रिकेत नाव नाही. त्यामुळे पुन्हा एकदा सिद्ध झालंय, की हे सरकार राजकीय अभिनिवेशातूनच वागत असते. प्रत्येक ठिकाणी राजकारण करतंय. कार्यक्रम पत्रिकेवर नाव तर नाहीच, परंतु आतापर्यंत या कार्यक्रमाचं निमंत्रण सुद्धा आम्हाला आलेलं नाही, अशी जाहीर नाराजीही त्यांनी व्यक्त केली.

साहेबांचं नाव पत्रिकेवर असो अथवा नसो, परंतु महाराष्ट्रातील जनतेच्या हृदयावर त्यांचं नाव कोरलं गेलंय. जिल्हा परिषद आणि पंचायत समितीच्या निवडणूक झाल्या, त्यात देवेंद्रंच्या नेतृत्वावर जनतेनं शिक्कामोर्तब केलंय. विरोधी पक्षात असूनही सर्वाधिक मोठं यश भाजपला मिळालंय. त्यामुळं पत्रिकेवर नाव नसलं, तरी देवेंद्रचं नाव जनतेच्या मनात कायम आहे, असंही त्यांनी सांगितलं. त्यामुळे चिपी विमानतळाच्या लोकार्पण सोहळ्यावरुन मानापमान नाट्य रंगण्याची चिन्हे दिसत आहेत.