सोनाली नवांगुळ यांना साहित्य अकादमीचा पुरस्कार जाहीर

कोल्हापूर: प्रसिद्ध लेखिका सोनाली नवांगुळ यांना ‘मध्यरात्रीनंतरचे तास’ या अनुवादित कादंबरीसाठी आणि मंजूषा कुलकर्णी यांना ‘प्रकाशवाटा’ या पुस्तकाच्या संस्कृत अनुवादासाठी साहित्य अकादमीचा पुरस्कार शनिवारी जाहीर झाला आहे. रोख पन्नास हजार रुपये, सन्मानचिन्ह व मानपत्र असे या पुरस्काराचे स्वरूप आहे.

प्रसिद्ध तमीळ बंडखोर लेखिका व कवयित्री सलमा यांनी लिहिलेल्या ‘द अवर पास्ट मिडनाईट’ या कादंबरीचा ‘मध्यरात्रीनंतरचे तास’ हा अनुवाद असून मनोविकास प्रकाशन संस्थेने ही अनुवादित कादंबरी प्रकाशित केली आहे. भारतीय प्रादेशिक भाषांमधील बंडखोर लेखिकांचा परिचय मराठी साहित्य विश्‍वाला करून देण्यासाठी पुण्याच्या मनोविकास प्रकाशन संस्थेने कविता महाजन यांच्या संपादकीय मार्गदर्शनाखाली ‘भारतीय लेखिका’ हा प्रकल्प हाती घेतला होता. या प्रकल्पातूनच ‘मध्यरात्रीनंतरचे तास’ या अनुवादित कादंबरीची निर्मिती झाली.

प्रकाश आमटे यांच्या ‘प्रकाशवाटा’ या मराठीतील आत्मचरित्रात्मक ग्रंथाचा कुलकर्णी यांनी संस्कृतमध्ये ‘प्रकाशमार्ग’ या नावाने अनुवाद केला आहे. प्रा. डॉ. बलवंत जेऊरकर, सूर्यनारायण रणसुभे आणि प्रतिमा इंगोले यांचा परीक्षकांमध्ये समावेश होता.

सलमा यांनी तरुण महिलांच्या भावना, घुसमट आणि त्यांचे बंड परखडपणे मांडले. ‘मनोविकास’ च्या प्रकल्पामुळे ही कादंबरी मराठी वाचकांच्या भेटीला आली आणि साहित्य अकादमीने दखल घेतल्याचा निश्चितच आनंद आहे.

- सोनाली नवांगुळ

मराठी साहित्यकृतीचा संस्कृत भाषेत अनुवाद केलेल्या पुस्तकाला मिळालेला हा पहिला पुरस्कार आहे. या पुरस्काराने मला खूप आनंद झाला आहे. या पुरस्काराने आज सर्वांना संस्कृत भाषेचे महत्त्व कळण्यास मदत होईल.

- प्रा. डॉ. मंजूषा कुलकर्णी