संभाजी भिडे चक्कर येऊन सायकलवरुन पडले, खुब्याला लागला मुका मार

सांगली : आपल्या सडेतोड वक्तव्यांमुळं नेहमी चर्चेत असलेले शिवप्रतिष्ठान हिंदुस्तानचे संभाजी भिडे गुरुजी (Sambhaji Bhide) यांना चक्कर आल्यानं सायकलवरुन पडल्याची माहिती मिळत आहे. यात ते गंभीर जखमी झाले असून त्यांना कमरेखाली खुब्याला मार लागला आहे.

दरम्यान, संभाजी भिडेंना भारती रुग्णालयात (Bharti Hospital) उपचारासाठी दाखल करण्यात आल्याचंही कळतंय. संभाजी भिडे सांगलीतील (Sangli) गणपती मंदिरात दर्शनासाठी नियमित जात असतात. आजही ते दर्शनासाठी सायकलवरुन जात होते. त्यावेळी गणपती पेठ परिसरात त्यांना चक्कर आल्यानं ते जमिनीवर कोसळले. हा प्रकार आजूबाजूच्या लोकांना लगेच लक्षात आला. त्यांनी भिडे यांना तत्काळ उचलून बाजूला बसवलं. काही वेळात भिडे गुरुजी हे शुद्धीवर आले. मात्र, या घटनेत त्यांच्या खुब्याला मुक्का मार लागला आहे.

देशाला गांधीवादी विचारांची बाधा झालीय : संभाजी भिडे

'देशाला म्लेंच्छ, आंग्लवादी आणि गांधीवादी विचारांची बाधा झालीय. त्यावर छत्रपती हा एकच उपाय आहे. देश उभारायचा असेल तर १२३ कोटी जनतेचा रक्तगट बदलायला हवा,' असं वक्तव्य 'शिवप्रतिष्ठान हिंदुस्थान'चे संस्थापक संभाजी भिडे (Sambhaji Bhide) यांनी केलंय. त्यांच्या या वक्तव्यावरून नवा वाद निर्माण होण्याची शक्यता आहे. सांगली जिल्ह्यातील मिरज (Miraj) इथं छत्रपती शिवाजी महाराज स्मारक लोकार्पण सोहळ्यात ते बोलत होते.