वेट अँड वॉच, बाप-बेटे जेल मधे जाणार!; राऊतांचा सोमय्यांना इशारा

शिवसेनेचे खासदार संजय राऊत (Sanjay Raut) यांनी काल शिवसेना भवनात पत्रकार परिषद घेतली. राजकीय वर्तुळात राऊत कोणते बॉम्ब फोडणार याकडे सर्वांचे लक्ष लागले होते. भाजपचे साडेतीन नेते तुरुंगात जाणार असल्याची माहिती त्यांनी भाषणात दिली होती. भाजपाचे (BJP) साडेतीन नेते त्यांच्या रडारवर असल्याची त्यांनी सांगितले होते. या भाषणात राऊतांनी सगळ्यात आधी किरीट सोमय्या यांचा उल्लेख केला. सोमय्यांचे (Kirit Samaiya) पीएमसी बँक (PMC Bank) घोटाळ्यात असलेले संबंध त्यांनी अधोरेखित केले. याचे काही पुरावेही राऊत यांनी माध्यमांसमोर ठेवले होते. आता पुन्हा एकदा त्यांनी ट्वीट करत किरीट सोमय्या आणि त्यांचा मुलगा निल सोमय्यावर (Nil Somaiya) निशाणा साधला आहे. (Sanjay Raut Criticize Kirit Somaiya)

यात ते म्हणतात, बाप बेटे जेल मधे जाणार! वेट अॅंड वॉच, कोठडीचे सॅनटायजेशन सुरू आहे. जय महाराष्ट्र!, असे म्हणत त्यांनी सोमय्या आणि त्यांच्या मुलाला इशारा दिला आहे. दरम्यान, आता या ट्वीटमुळे पुन्हा एकदा चर्चांना उधाण आलं आहे. काल झालेल्या पत्रकार परिषदेत राऊत यांनी भाजपावर सडकून टीका केली. अनेक नेत्यांची नावे घेत घोटाळे बाहेर काढणार असल्याचा इशारा दिला आहे. याशिवाय मोहित कंबोज (Mohit Kamboj) यांचे नाव घेऊन त्यांनी देवेंद्र फडणवीस यांच्यावरही हल्लाबोल केला आहे.

दरम्यान, सोमय्यांच्या आरोपांना प्रत्युत्तर देत असताना राऊत यांनी देवेंद्र फडणवीस (Devendra Fadnavis) यांचा उल्लेख केला. देवेंद्र फडणवीस यांच्या सरकारच्या काळात ठराविक लोकांना कंत्राटं मिळाली. एस.नरवर या व्यक्तीचा उल्लेख केला. नरवर यांचा दुधाचा व्यवसाय आहे. भाजचं महाराष्ट्रात सरकार आल्यानंतर या व्यक्तीचा राज्यात वावर वाढला आणि पाच वर्षात त्याची संपत्ती 700 कोटींवर गेल्याचा आरोप राऊत यांनी केला. राऊत यांना पत्रकार परिषदेनंतर साडेतीन नेत्यांची नावं विचारण्यात आली. मात्र, त्यांनी ही नावं उद्यापासून समोर येणार असल्याचं सांगितलं आहे.