महाविकास आघाडीत इच्छा नसतानाही काही निर्णय घ्यावे लागले; देसाईंचा नेमका निशाणा कोणावर?

कऱ्हाड (सातारा) : महाविकास आघाडी सरकारमध्ये (Maha Vikas Aghadi Government) आम्ही असताना काही निर्णय हे इच्छा नसतानाही अनिश्चेने घ्यावे लागले. मी अर्थराज्यमंत्री असूनही मला निर्णय घेण्याचा अधिकार नव्हता. आमचं सरकार आल्यावर राज्याच्या हितासाठी काही निर्णय मुख्यमंत्री-उपमुख्यमंत्र्यांनी बदलले, अशी माहिती उत्पादन शुल्क मंत्री शंभूराज देसाई (Shambhuraj Desai) यांनी दिली.

मंत्री देसाई पुढं म्हणाले, महाविकास आघाडी सरकारमध्ये मी गृहराज्यमंत्री, अर्थराज्यमंत्री होतो. त्यावेळी आम्हाला निर्णय घेण्याचा अधिकार देण्यात आलेला नव्हता. त्यामुळं काही निर्णय हे आम्ही मंत्री असतानाही अनिश्चेने घ्यावे लागले होते. त्यामध्ये राज्याचं हित नव्हतं. आमचं सरकार आल्यावर मुख्यमंत्री एकनाथ शिंदे (Eknath Shinde), उपमुख्यमंत्री देवेंद्र फडणवीस (Devendra Fadnavis) यांनी काही निर्णय राज्याच्या हितासाठी बदलले आहेत. त्यामुळं त्यातून राज्याचा फायदाच होईल, असं त्यांनी स्पष्ट केलं.

चोरटी दारु रोखण्याचे आदेश

राज्याला उत्पादन मिळवून देणारे तिसऱ्या क्रमांचे उत्पादन शुल्क विभाग आहे, असं सांगून ते म्हणाले, माझ्याकडील विभागाने १८ हजार कोटी रुपयांचा निधी सरकारी तिजोरीत जमा केला आहे. कर चुकवेगिरी, बॉर्डरच्या जिल्ह्यातून होणारी चोरटी दारु वाहतूक रोखण्यासाठी नवीन आराखडा तयार करण्याच्या सूचना दिल्या आहेत. त्यातून माझ्याकडील विभागाचे उत्पन्न वाढवण्याचा माझा प्रयत्न राहील, असंही देसाईंनी सांगितले.