Sharad Pawar : ''मीसुद्धा शेतकरी दिंडी काढली होती...'', रोहित पवारांच्या यात्रेवरुन शरद पवार बोलले

पुणेः राज्यातील तरुणांच्या आणि सर्वसामान्यांच्या प्रश्नासाठी आमदार रोहित पवार यांची युवा संघर्ष यात्रा सुरु झाली आहे. राष्ट्रवादी काँग्रेसचे अध्यक्ष शरद पवार यांच्या शुभहस्ते या यात्रेला सुरुवात झाली. पुण्यात आयोजित कार्यक्रमामध्ये शरद पवार बोलत होते.

यावेळी बोलताना शरद पवार म्हणाले की, मी जळगावपासून शेतकरी दिंडी काढली होती. नागपूरच्या अधिवेशनात दिंडी नेत शेतकऱ्यांचे प्रश्न मांडले होते. आज त्याहीपेक्षा मोठी यात्रा निघतेय. ही दिंडी नव्या पीढीची आहे. नव्या पिढीला प्रोत्साहन देणारी आहे.

पवार पुढे म्हणाले की, राज्यामध्ये युवकांचे, शेतकऱ्यांचे अनेक प्रश्न आहेत. परंतु सरकारचं अजिबात लक्ष नाही. तरुणांनी सरकारला प्रश्नांची जाणीव करुन द्यावी. त्यासाठीच ही यात्रा आयोजित करण्यात आलेली आहे. रोहित पवार आणि त्यांच्या सहकाऱ्यांसाठी मी हवी ती मदत करायला तयार आहे, असे ते म्हणाले.

शिक्षणाच्या मुद्द्यावर बोलताना शरद पवार म्हणाले की, राज्यामध्ये शिक्षण क्षेत्राची अवस्था बिकट झाली आहे. शिक्षकांची लाखो पदं रिकामी आहेत. ती भरली जात नाहीत. एकीकडे शाळा सुरु आहेत तर दुसरीकडे शिक्षक नाहीत. असं म्हणत पवारांनी सरकारवर ताशेरे ओढले.

रोहित पवार यांची युवा संघर्ष यात्रा राज्यभर फिरणार आहे. मंगळवारी यात्रा जालन्यात असेल आणि कुटुंबातील अनेक सदस्य यात्रेमध्य सहभागी होतील, असं रोहित पवारांनी स्पष्ट केलं होतं. या यात्रेमध्ये राष्ट्रवादी काँग्रेस पक्षाचे अनेक तरुण सहभागी होणार आहे. सरकारला प्रश्नांची जाणीव करुन देऊन ते सोडवण्यासाठी आवाज उठवण्यात येणार आहे.