PM Narendra Modi: ‘नरेंद्र मोदी २०२४ मध्ये पंतप्रधान न झाल्यास भर चौकात फाशी घेणार’; शिंदे गटातील नेत्याचं वक्तव्य

राज्यासह देशाचं लक्ष लागलेल्या आमदार अपात्रतेच्या प्रकरणावर निकाल देताना विधानसभा अध्यक्ष राहुल नार्वेकर यांनी शिवसेना शिंदे गट किंवा ठाकरे गट यापैकी कोणत्याही गटाच्या आमदारांना अपात्र केलं नाही. मात्र, उद्धव ठाकरे यांना मोठा धक्का बसला असून शिवसेना ही मुख्यमंत्री एकनाथ शिंदे यांच्याकडे सोपवली आहे. त्यानंतर शिवसेनेकडून ठिकठिकाणी आंनद, जल्लोष साजरा केला जात आहे. यावरून शिंदे गटाचे आमदार संतोष बांगर यांनी माध्यमांना प्रतिक्रिया दिली आहे. यावेळी त्यांनी मोठं विधान केलं आहे.

आमदार संतोष बांगर म्हणाले, 'प्रत्येकाला माहिती आहे की, शिवसेना आणि भारतीय जनता पार्टीलाच आपल्याला निवडुन द्यायचं आहे. छाती ठोकून सांगतो. २०२४ चा निकाल हा आमच्याच बाजूने लागणार आहे. एप्रिलमध्ये आगामी लोकसभेची निवडणूक आहे. छाती ठोकून सांगतो, २०२४ ला नरेंद्र मोदीच पंतप्रधान होणार. जर नरेंद्र मोदी पंतप्रधान झाले नाहीत, तर भर चौकात फाशी घेईन देशाचे पंतप्रधान नरेंद्र मोदीच होतील', असंही संतोष बांगर म्हणाले.

शिंदेंच्या १६ आमदारांना अपात्र करता येणार नाही, नार्वेकरांनी फेटाळली याचिका

विधानसभा अध्यक्षांनी शिंदेंच्या १६ आमदारांना अपात्र करण्याची याचिका फेटाळून लावली आहे. यामुळे शिंदे गटातील आमदार पात्र ठरले आहेत.

ठाकरे गटाचे १४ आमदारही पात्र! विधानसभा अध्यक्षांचा मोठा निर्णय

ठाकरे गटाचे १४ आमदार देखील पात्र असल्याचा निकाल विधानसभा अध्यक्ष राहुल नार्वेकरांनी दिला आहे. यामुळे या प्रकरणातील शिंदे आणि ठाकरे गटाचे मिळून सर्व ४० आमदार पात्र ठरले आहेत. एकमेकांना अपात्र करण्याच्या दोन्ही गटांच्या याचिका अध्यक्षांनी फेटाळून लावल्या आहेत.