'अजूनही यौवनात मी', फडणवीसांवर संजय राऊतांची मिश्किल टिप्पणी

पुणे : राज्याचे विरोधी पक्षनेते देवेंद्र फडणवीस (devendra fadnavis) यांनी 'मला अजूनही मुख्यमंत्री आहे, असं वाटतं' असे वक्तव्य केले होते. त्यानंतर राजकीय वर्तुळात एकच चर्चा रंगली आहे. त्यावरच आता शिवसेनेचे खासदार संजय राऊत (MP Sanjay raut) यांनी मिश्किल प्रतिक्रिया दिली आहे. फडणवीसांनी स्वप्नात रममान व्हावे. त्यांची भावना योग्य आहे. त्यांनी चांगली स्वप्न पाहावी, असे संजय राऊत म्हणाले. आज पुणे दौऱ्यावर असताना त्यांनी पत्रकारांशी संवाद साधला.

नवी मुंबईतील बेलापूर येथे मंदा म्हात्रे यांनी कार्यक्रम आयोजित केला होता. यामध्ये राज्याचे विरोधी पक्षनेते देवेंद्र फडणवीस यांची प्रमुख उपस्थिती होती. ''तुमच्यासारखे नेते पाठीशी असल्यामुळे मला एकही दिवस जाणवलं नाही, की मुख्यमंत्री नाही. मी मुख्यमंत्रीच आहे, असं मला वाटतं. तुम्ही मला त्याची कमतरता जाणवू दिली नाही. शेवटी मनुष्य कुठल्या पदावर आहे हे महत्वाचं नाही. तो काय करतो हे महत्वाचं आहे'', असं फडणवीस म्हणाले होते. त्यावरूनच संजय राऊतांनी टीप्पणी केली आहे.

''कोणाला कधी-कधी वाटतं की अजूनही यौवनात मी. असं नाटक खूप गाजलं आहे. त्यामुळे फडणवीसांनी वाटत असावे की ते अजूनही मुख्यमंत्री आहेत. आम्हालाही दिल्लीत गेल्यानंतर वाटतं. त्यांची भावना योग्य आहे. त्यांनी स्वप्नात रममान व्हावे. प्रत्येकाला स्वप्न बघण्याचा अधिकार आहे. त्यांनी चांगली स्प्नन पाहावी. त्यांच्या पंखाना बळ मिळावं. त्यांच्या पंखात अधिक ताकद येवो. त्यासाठी माझ्या त्यांना शुभेच्छा आहे'', असेही राऊत म्हणाले.

गेली दोन वर्ष एकही दिवस घरात न थांबता मी जनतेच्या सेवेत आहे. त्यामुळे जनतेनेही मला जाणवू दिलं नाही, असेही फडणवीस म्हणाले. त्यावर बोलताना संजय राऊत म्हणाले ''राज्याचे विरोधी पक्षनेत्यांनी आम्ही नेहमी शाडो मुख्यमंत्री समजतो. त्यामुळे त्यांनी कायम त्या भूमिकेत राहावे.''