Sunil Kedar News : सुनील केदार यांना मोठा धक्का! जामीन अन् शिक्षेला स्थगिती नाहीच

काँग्रेसचे दिग्गज नेते आणि माजी मंत्री सुनील केदार यांना दिलासा देण्यास न्यायालयाने नकार दिला आहे. सुनिल केदार यांना जामीन आणि शिक्षेला स्थगिती देण्याची मागणी सत्र न्यायालयाने नाकारली आहे. त्यामुळे सुनिल केदार यांच्या अडचणीत वाढ होणार आहे.

जिल्हा मध्यवर्ती बॅंकेच्या घोटाळा प्रकरणात आरोपी असलेले माजी आमदार सुनील केदार यांना बुधवारी (ता.२८) रात्री मेडिकलमधील अतिदक्षता विभागातील चार तज्ज्ञ डॉक्टरांनी प्रकृती बरी असल्याचा अहवाल सादर केला. यानंतर त्यांची रवानगी कारागृहात करण्यात आली होती. जिल्हा मध्यवर्ती बॅंकेच्या घोटाळ्याच्या निकाल २२ डिसेंबरला देण्यात आला. निकालात पाच वर्षाची शिक्षा माजी आमदार सुनील केदार यांना ठोठावण्यात आली. याच दिवशी छातीत दुखत असल्याने त्यांना मेडिकलमध्ये अतिदक्षता विभागात दाखल करण्यात आले होते.

काँग्रेसचे नेते केदार यांना नागपूर जिल्हा बँक घोटाळा प्रकरणात पाच वर्षांच्या कारावासाच्या शिक्षेसह १२.५० लाख रुपयांच्या दंडाची शिक्षा सुनावण्यात आली आहे. जिल्हा बँक घोटाळा प्रकरणाचा निकाल तब्बल २२ वर्षांनंतर लागला आहे. या प्रकरणात सुनील केदार यांच्यासह सहा जणांना ही शिक्षा सुनावली आहे. तर या प्रकरणातून तीन जणांची निर्दोष मुक्तता करण्यात आली आहे.