टुलकिट प्रकरण: वाॅरंट नसताना दिल्ली पोलिसांनी घरातील साहित्य जप्त केले, शंतनू मुळूकच्या वडिलांची पोलिस अधीक्षकांकडे तक्रार

बीड : येथील चाणक्यपुरीतील रहिवाशी शंतनू मुळूक याच्याविरोधात टुलकिट प्रकरणी दिल्ली पोलिसांनी गुन्हा दाखल केला आहे. मंगळवारी (ता.16) मुंबई उच्च न्यायालयाच्या औरंगाबाद खंडपीठाने अटकपूर्व जामीन मंजूर केले आहे. शंतनू याने जामीन अर्जासाठी अर्ज केला होता. त्यावर मंगळवारी सुनावणी झाली व त्याला जामीन मंजूर झाला आहे. शंतनू याचे वडील शिवलाल मारुतीराव मुळूक यांनी बीडच्या पोलिस अधीक्षकांकडे निवेदन दिले आहे.

निवेदनात म्हटले आहे, की 12 फेब्रूवारी रोजी घरी दोघे व्यक्ती आले व त्यांनी स्वतः दिल्ली पोलिस असल्याचे सांगितले. आम्हाला शंतनूची चौकशी करावयाचे म्हणाले. त्याने देशद्रोह केला आहे व तो खलिस्तानी लोकांच्या संपर्कात आहे असे म्हणून त्या दोन व्यक्तींना घरामधील सर्व खोल्यांची झडती घेतली व घरातून काँप्युटरची एक हार्डडिस्क, शंतनूच्या रुममधील एक पर्यावरणाविषयी पोस्टर, मोबाईलचे कव्हर व एक पुस्तक अशा चार वस्तू जप्त केल्या. पुढे ते म्हणतात, की हे सर्व करित असताना दिल्ली पोलिसांनी शोध अथवा जप्ती संदर्भातील कसलेही वाॅरंट दाखवले नाही.

तसेच जप्त केलेल्या वस्तूंचा कसलाही पंचनामा केला नाही व त्या घेऊन जाताना आमची कसलीही सहमती देखील घेतली नाही व वस्तू आम्ही तुम्हाला परत करु, असे म्हणून निघून गेले. परंतु 12 फेब्रूवारी पासून ते बीडमध्येच थांबलेले आहेत. अधून-मधून चौकशी कामी म्हणून शासकीय विश्रामगृहात बोलावून घेत आहेत. गेल्या दोन-तीन दिवसांपासून विविध वृत्त वाहिन्यांवर मुलाचे नाव घेऊन बातम्या येत आहेत. यात आमच्या मुळाने फार मोठ कट केला आहे, असे वारंवार सांगितले जात आहे.

त्यामुळे 12 फेब्रूवारी रोजी घरी घडलेला प्रकार स्थानिक पोलिस प्रशासनास सांगणे आवश्यक वाटत असल्याचे ते म्हणतात. कारण त्या व्यक्तींच्या सोबत त्या दिवशी अथवा त्या नंतर कधी कुठलाही स्थानिक प्रशासनातील व्यक्ती नव्हता. हे प्रकरण राष्ट्रीय पातळीवर चर्चिले जात आहे. त्यामुळे एक कर्तव्यदक्ष नागरिक म्हणून घडलेला प्रकार कळविणे गरजेचे वाटते. तरी आपण घडलेल्या प्रकाराची नोंद घेऊन योग्य ती कारवाई करावी,  ही विनंती शिवलाल मुळूक यांनी पोलिस अधीक्षकांकडे केला आहे.      

संपादन - गणेश पिटेकर