Rashmi Shukla: रश्मी शुक्लांचं पोलीस महासंचालकपद पुन्हा वेटिंगवर! महायुतीमधील नेत्यांच्या त्या भूमिकेमुळं अडचण

मुंबई : राज्याचे पोलीस महासंचालक रजनीश शेठ रविवारी सेवानिवृत्त झाले आहेत. रजनीश सेठ यांच्या निवृत्तीनंतर त्यांच्या जागी आयपीएस अधिकारी रश्मी शुक्ला यांची वर्णी लागेल अशा चर्चा सुरु होत्या. मात्र, आज रजनीश सेठ यांच्या निवृत्तीनंतर तात्पुरता अतिरिक्त कार्यभार मुंबई पोलीस आयुक्त विवेक फणसळकर यांच्याकडे देण्यात आला आहे. त्यामुळं रश्मी शुक्ला यांचं राज्याच्या पोलीस महासंचालकपद पुन्हा लांबणीवर पडल्याच्या चर्चा आहेत.

राज्याचे पोलीस महासंचालक रजनीश सेठ निवृत्त झाले. रजनीश सेठ यांच्या निवृत्तीनंतर आता कार्यभार तात्पुरत्या स्वरुपात मुंबई पोलीस आयुक्त विवेक फणसळकर यांच्याकडे देण्यात आला आहे.

रश्मी शुक्ला यांच्या नावाला महायुती सरकारमधील नेत्यांचा विरोध?

आयपीएस अधिकारी रश्मी शुक्ला या महाविकास आघाडी सरकारच्या काळात अडचणीत आल्या होत्या. रश्मी शुक्ला यांच्यावर कथित फोन टॅपिंग प्रकरणी आरोप करण्यात आले होते. मविआ सरकारच्या काळात त्यासंदर्भात चौकशी देखील करण्यात आली होती. मविआ सरकारमधील तत्कालीन गृहमंत्री दिलीप वळसे पाटील यांनी रश्मी शुक्ला यांच्या कार्यकाळातील नाना पटोले, बच्चू कडू, आशिष देशमुख आणि संजय राऊत, एकनाथ खडसे यांचे फोन टॅप केल्याप्रकरणी माहिती दिली होती.

महाविकास आघाडीनं यासंदर्भातील कारवाई सुरु करताच रश्मी शुक्ला यांची प्रतिनियुक्तीवर केंद्र सरकारच्या सेवेत बदली करण्यात आली होती. त्यानतंर त्या सीआरपीएफमध्ये कार्यरत होत्या. दरम्यानच्या काळात राज्यात सत्तांतर झाल्यानंतर रश्मी शुक्ला यांच्या विरोधातील प्रकरणांची चौकशी बंद झाली.

राज्याचे पोलीस महासंचालक रजनीश शेठ सेवानिवृत्त झाल्यानंतर पोलीस संचालक म्हणून रश्मी शुक्ला यांच्या नावाची अद्यापही घोषणा करण्यात आलेली नाही. मुंबईचे पोलीस आयुक्त विवेक फणसळकर यांच्या महासंचालक पदाचा तात्पुरता अतिरिक्त कार्यभार देण्यात आला आहे. महायुतीमधील अनेकांचा रश्मी शुक्ला यांच्या नावाला विरोध असल्याने अद्याप निर्णय होत नसल्याचे म्हटले जात आहे. यामुळं रश्मी शुक्ला यांची नियुक्ती पुन्हा लांबणीवर पडल्याचं बोललं जात आहे. त्यामुळं सध्या तात्पुरता पदभार मुंबई पोलीस आयुक्तांकडे देण्यात आलाय. (Latest Marathi News)