Weather Update : राज्यात मान्सून कधी सक्रीय होणार? मुंबईत 'या' दिवशी बरसणार पाऊस; हवामान खात्याने दिली माहिती

केरळनंतर महाराष्ट्रात मान्सून दाखल होऊन बराच काळ लोटला आहे, मात्र अद्यापही राज्यातील अनेक जिल्ह्यांना पावसाची प्रतिक्षा आहे. यादमम्यान उकाड्याने नागरिक हैराण झाल्याचं पाहायला मिळत आहे. पेरणीची वेळ उलटून गेल्याने पावसासाठी शेतकरी आभाळाकडे डोळे लाऊन बसले आहेत. नेमकं राज्यात मान्सून पुन्हा कधी सक्रिय होईल याकडे सर्वांचे लक्ष लागलेले असतानाच हवामान विभागाने महत्वाची अपडेट दिली आहे.

हवामान विभागाने दिलेल्या माहितीनुसार, राज्यात मान्सून २६ जूननंतर सक्रीय होईल असा अंदाज वर्तवण्यात आला आहे. त्यामुळे पावसासाठी सामान्या नागरिक ते शेतकरी यांनी आणखी काही दिवसांची वाट पाहावी लागणार आहे. बिपरजॉय चक्रीवादळामुळे यावर्षी मान्सूनच्या प्रवासावर मोठा परिणाम झाल्याचं पाहायला मिळत आहे.

दरम्यान आता राज्यात मान्सून २६ जून नंतर पुन्हा सक्रिय होईल आणि या आठवड्याच्या शेवटी मुंबईत मान्सूनचा जोर वाढेल असा अंदाज वर्तवण्यात येत आहे. तसेच २३ आणि २४ जूननंतर अरबी समुद्रावरुन येणाऱ्या वाऱ्यांना गती मिळण्याची शक्यता असल्याचा अंदाज हवामान खात्याने वर्तवला आहे.

महाराष्ट्रासोबतच पुढील पाच दिवस दक्षिण भारतातील राज्यांमध्ये हलका ते मध्यम पाऊस आणि विजांच्या कडकडाटासह पाऊस पडू शकतो. तामिळनाडूत मंगळवारी आणि किनारी आंध्र प्रदेशात पुढील दोन दिवस पावसाची शक्यता आहे.

मंगळवारी सकाळी चेन्नई, तिरुवल्लूर, कांचीपुरम आणि चेंगलपट्टू जिल्ह्यात मुसळधार पावसाची शक्यता आहे. मंगळवारी सकाळी कांचीपुरम आणि चेंगलपट्टू जिल्ह्यात मुसळधार पाऊस पडण्याची शक्यता आहे. या जिल्ह्यांच्या आसपासच्या भागातही पाऊस पडू शकतो.