अशोक चव्हाणांनंतर आणखी एका आमदाराबाबत उलटसुलट चर्चा; NCP प्रवेशावर खोडकेंचं स्पष्टीकरण

अमरावती : कॉंग्रेसचे ज्येष्ठ नेते अशोक चव्हाण (Ashok Chavan) भाजपमध्ये जाणार असल्याची चर्चा सुरु असतानाच आणखी एका आमदाराबाबत उलटसुलट चर्चा सुरू झालीय. अमरावतीच्या कॉंग्रेस आमदार सुलभा खोडके (Amravati Congress MLA Sulabha Khodke) यांच्याबद्दल जिल्ह्यात उलटसुलट चर्चांना उधाण आलंय. त्याला कारणही तसंच आहे.

कॉंग्रेसचे प्रदेशाध्यक्ष नाना पटोले (Nana Patole) गेल्या दोन दिवसांपासून अमरावतीच्या दौऱ्यावर आहेत. भारत जोडो अभियानांतर्गत अमरावती (Amravati) शहरासह जिल्ह्याचा दौरा केला. या दौऱ्यात आमदार खोडके दोन्ही दिवस गायब होत्या. आमदार ही महत्वाची व्यक्ती प्रदेशाध्यक्षांच्या दौऱ्यात गायब असल्यानं कॉंग्रेसच्या कार्यकर्त्यांसह राष्ट्रवादीच्या (NCP) गोटातही कुजबुज सुरू झाली.

आमदार खोडके राष्ट्रवादी कॉंग्रेसमध्ये तर गेल्या नाहीत ना, अशीही शंका काहींनी उपस्थित केली. कारण, त्यांचे पती संजय खोडके हे राष्ट्रवादी कॉंग्रेसचे नेते आहेत. राज्याच्या विधानसभेतील विरोधी पक्षनेते अजित पवार (Ajit Pawar) यांचे ते कट्टर समर्थक असल्याचं सांगण्यात येतं. त्यामुळं या शंकेला बळ मिळतं, असं काहींचं मत आहे. मात्र, यावर सुलभा खोडके यांनी स्पष्टीकरण दिलंय. मी काँग्रेसमध्येच आहे, यापुढंही काँग्रेस पक्षाकडूनच निवडणूक लढवणार आहे. प्रदेशाध्यक्ष नाना पटोले यांच्या दौऱ्यामध्ये अनुपस्थित राहिली, याबाबत दिलगिरी व्यक्त करते. अशी पोस्ट आमदार खोडके यांनी फेसबुकच्या माध्यमातून केली आहे. 2019 च्या विधानसभा निवडणुकीमध्ये अमरावती विधानसभा मतदार संघ (Amravati Assembly Constituency) हा कॉंग्रेससाठी सोडण्यात आला होता. त्यामुळं खोडके यांनी कॉंग्रेसकडून उमेदवारी मिळवून निवडणूक लढवली होती.