'अग्गंबाई सूनबाई'ला ट्रोल करणाऱ्यांना 'अभिजीत राजें'चं सडेतोड उत्तर

सोशल मीडियामुळे सेलिब्रिटी आणि चाहते यांच्यातील दरी कमी झाली. मात्र ट्रोलिंगचंही प्रमाण खूप वाढलंय. सर्वसामान्यांपेक्षा सेलिब्रिटींना ट्रोलर्सचा अधिक सामना करावा लागतो. त्यातही काही सेलिब्रिटी ट्रोलर्सना सडेतोड उत्तर देतात तर काहीजण त्याकडे दुर्लक्षच करणं पसंत करतात. झी मराठी वाहिनीवरील 'अग्गंबाई सासूबाई' या मालिकेतील कलाकारांनाही सोशल मीडियावर ट्रोल केलं गेलं. आता ही मालिका नव्या रुपात प्रेक्षकांच्या भेटीला आली आहे. यानिमित्त नुकत्याच दिलेल्या एका मुलाखतीत अभिनेते गिरीश ओक यांनी ट्रोलर्सना सडेतोड उत्तर दिलं आहे. गिरीश ओक हे मालिकेत अभिजीत राजेंची भूमिका साकारत आहेत. 

"अग्गंबाई सूनबाई मालिकेतील माझी भूमिका थोडीफार बदलली आहे. आता अभिजीत राजेंना घरातलं सगळं सांभाळायचं आहे. पण त्यामुळे त्यांचा स्वभाव बदललेला नाही. ते आधीसारखंच आनंदाचा शोध घेणारे अभिजीत राजे आहेत", असं त्यांनी भूमिकेविषयी सांगितलं. 'मुंबई तक'ला दिलेल्या मुलाखतीत त्यांनी ट्रोलिंगवरही भाष्य केलं. "सध्या सोशल मीडियावर एखाद्याला ट्रोल करणं खूप सोपं झालंय. पण जेव्हा एखादी गोष्ट सोपी होते, तेव्हा त्याची किंमत राहत नाही. पण ते आपल्या मनाला किती लावून घ्यायचं हा आपापला प्रश्न असतो. कलेचं कौतुक कोणी करत नाही, फक्त टीका करतात. त्रस्त झालेले, नट किंवा दिग्दर्शक होऊ न शकलेले आपणच ग्रेट आहोत असं समजून ट्रोल करत असतात. पण मला माहितीये की मी चांगलं काम करतोय. सोशल मीडियावर हेतुपुरस्सर कमेंट्स खूप असतात. त्याकडे जितकं लक्ष देणार, तितका त्रास होतो. गजराज चालत असतो तेव्हा श्वान भुंकत असतात. पण गजराज त्याकडे लक्ष देत नाही", असं ते म्हणाले. 

हेही वाचा : "मी तर निंदकाशीच लग्न केलंय"; निवेदिता यांनी अशोक सराफांबद्दल असं का म्हटल?

१५ मार्चपासून 'अग्गंबाई सूनबाई' ही मालिका सुरू झाली आहे. यामध्ये गिरीश ओक, निवेदिता सराफ, उमा पेंढारकर आणि अद्वैत दादरकर यांच्या मुख्य भूमिका आहेत. या नव्या मालिकेत शुभ्राची भूमिका उमा तर सोहम ऊर्फ बबड्याची भूमिका अद्वैत साकारतोय.