Milind Soman: अभिनेता मिलिंद सोमण पंतप्रधान मोदींच्या भेटीला; त्यांचे आभार मानत म्हणाला...

अभिनेता मिलिंद सोमणने अलीकडेच पंतप्रधान नरेंद्र मोदी यांची भेट घेतली. बुधवारी मिलिंदने दिल्लीतील पंतप्रधान कार्यालयातून पंतप्रधानांसोबतचा स्वतःचा फोटो शेअर केला. नुकत्याच झालेल्या ‘युनिटी रन’ नंतर त्याने पंतप्रधान मोदींची भेट घेतली आणि दोघांनी ‘खेळ, आरोग्य आणि तंदुरुस्ती यांच्या प्राचीन भारतातल्या संबंधाबद्दल संवाद साधला.

ट्विटरवर दोघांचा फोटो पोस्ट करत मिलिंदम्हणतो की, युनिटी रननंतर पंतप्रधान नरेंद्र मोदी यांना भेटून खूप आनंद झाला. या भेटीत आम्ही क्रीडा, आरोग्य आणि फिटनेस यांच्या प्राचीन भारतीय परंपरांमधल्या संबंधांविषयी चर्चा केली. देशभरात योग आणि आयुर्वेदाचा प्रचार करण्यासाठी ते करत असलेल्या सर्व गोष्टींसाठी मी त्यांचे आभार मानले.”

मिलिंद सोमणने वृंदावन येथून त्याची पत्नी अंकिताने आणलेली कृष्णाची मूर्तीही पंतप्रधानांना भेट दिली. झाशी ते दिल्ली अशी 450 किमी ही युनिटी रन झाली. मिलिंदने स्वातंत्र्याच्या अमृत महोत्सवानिमित्त ही युनिटी रन केली होती. त्याने स्वातंत्र्यदिनी झाशीच्या किल्ल्यावरून सुरुवात केली आणि एका आठवड्यानंतर दिल्लीतील लाल किल्ल्याजवळ त्याची सांगता झाली.