फेसबुक लाइव्ह करताना अभिनेत्याने दिला आत्महत्येचा इशारा

'मंगल चंडी', 'मनसा' यांसारख्या टीव्ही शोमध्ये छोट्या भूमिका साकारणारा अभिनेता सुवो चक्रवर्ती Suvo Chakraborty याने फेसबुक लाइव्हदरम्यान आत्महत्येचा इशारा दिला. ८ जून रोजी सुवोने फेसबुक लाइव्हच्या माध्यमातून चाहत्यांशी संवाद साधला. यावेळी त्याने वर्षभरापासून काम मिळत नसल्याचं दु:ख व्यक्त केलं. यावेळी बोलत असताना सुवोने आत्महत्येचा इशारा दिल्याने त्याच्या मित्रांनी ताबडतोब पोलिसांना फोन करून कळवलं. पोलिसांनी सुवोच्या घरी धाव घेत तो सुरक्षित आणि सुखरुप असल्याचं स्पष्ट केलं. (actor Suvo Chakraborty threatens to end his life during Facebook live)

"अशा घटनांना आम्ही फार गंभीररित्या घेतो. एका फेसबुक युजरकडून काल रात्री आम्हाला कॉल आला होता आणि त्याने संबंधित फेसबुक लाइव्हबद्दल सांगितलं. घटनेची पडताळणी करण्यासाठी आम्ही त्वरित सुवोच्या घरी धाव घेतली. त्याच्या बहिणीशी आम्ही बोललो."

कोरोना महामारी आणि लॉकडाउन यांमुळे अनेक कलाकार बेरोजगार झाले आहेत. ऑगस्ट २०२० पासून हातात काहीच काम नसल्याचं सुवोने सांगितलं. माझ्या भूमिकांना प्रेक्षकांचं प्रेम मिळालं असलं तरी व्यावसायिकदृष्ट्या त्याचा काहीच उपयोग झाला नाही, असं तो म्हणाला. काही महिन्यांपूर्वीच सुवोच्या वडिलांचं निधन झालं होतं. या संपूर्ण परिस्थितीमुळे तो मानसिकदृष्ट्या खचला होता. 'I Quit' असं लिहिल्यानंतर झोपेच्या गोळ्या घेऊन आयुष्य संपवणार असल्याचा इशारा त्याने लाइव्हदरम्यान दिला होता.

सुवोच्या या लाइव्हनंतर घाबरलेल्या त्याच्या मित्रांनी पोलिसांची मदत घेतली. गेल्या वर्षी लॉकडाउनमध्येच सुवोची 'मंगल चंडी' ही मालिका बंद झाली होती. त्यानंतर त्याला कोणतंच काम मिळालं नाही. लॉकडाउनमुळे अनेक कलाकारांना आर्थिक अडचणींचा सामना करावा लागतोय.