गौहर खानच्या वडिलांचे निधन 

मुंबई - बॉलीवूडमधील प्रसिध्द अभिनेत्री गौहर खान हिच्या वडिलांचे आज निधन झाले. ते बराच काळापासून आजारी होते. त्यांचे नाव जाफर अहमद खान असे होते. गौहरनं सोशल मीडियावर ही बातमी आपल्या चाहत्यांना दिली. चाहत्यांनी तिच्या दु;खात सहभागी होत त्यांना भावपूर्ण श्रध्दांजली वाहिली आहे. काही दिवसांपूर्वी गौहरनं आपले वडिल एका रुग्णालयात असल्याची माहिती दिली होती. ते लवकरात लवकर बरे व्हावे यासाठी तिनं फॅन्सला देवाकडे प्रार्थना करण्यास सांगितले होते.

इंस्टावर एक पोस्ट शेअर करुन गौहरनं वडिलांविषयीच्या वेगवेगळ्या आठवणींना उजाळा दिला होता. गौहरची प्रीती सिमोस नावाची एक मैत्रीण आहे तिनं गौहरच्या वडिलांविषयी लिहिले होते. याशिवाय तिनं एक व्हिडिओही शेअर केला होता. माझ्या गौहरचे पप्पा यांच्यावर माझे खूप प्रेम होते. त्यांनी आपले जीवन मोठ्या सन्मानानं व्यतीत केले. ती त्यांची ओळख होती. देव गौहर खान आणि त्यांच्या परिवाराला या दु;खातून सावरण्याची शक्ती देवो, असे तिनं म्हटलं आहे.

गौहर खानच्या वडिलांच्या निधनाची बातमी विरल भयानीनं आपल्या सोशल मीडियावरुन शेअर केली आहे. दोन दिवसांपूर्वी गौहरनं वडिलांबरोबरचा एक फोटो शेअर केला होता. आता त्यांच्या अंत्यविधीचे फोटो समोर आले आहेत. ज्यात गौहर खान आपल्या परिवाराला आधार देताना दिसत आहे. याबरोबरच गौहर खानची आईही त्या फोटोमध्ये दिसून येत आहे. काही दिवसांपूर्वी गौहर खानचे जैद दरबारशी लग्न झाले होते. लग्नाला काही दिवस झाल्यानंतर गौहरच्या वडिलांचे झालेले निधन हे सर्वांच्या मनाला चटका लावणारे आहे.