'बबड्या'चा तेजश्री प्रधानला खास सल्ला; 'भूतकाळ विसर कारण..'

झी मराठी वाहिनीवरील 'अग्गंबाई सासूबाई' Aggabai Sasubai ही मालिका अल्पावधीतच लोकप्रिय ठरली होती. या मालिकेत सोहम ऊर्फ बबड्याची भूमिका साकारणारा आशुतोष पत्की Ashutosh Patki घराघरात पोहोचला. अभिनेत्री तेजश्री प्रधानने Tejashri Pradhan ऑनस्क्रीन आशुतोषच्या पत्नीची भूमिका साकारली होती. आता तेजश्रीच्या वाढदिवसानिमित्त आशुतोषने सोशल मीडियावर खास पोस्ट लिहिली आहे. (aggabai sasubai fame ashutosh patki gave special tips to tejashri pradhan )

आशुतोष पत्कीची पोस्ट-

'माझी प्रिय मैत्रीण, मला तुला हे सांगायचं आहे की तू माझ्यासाठी खूप महत्त्वाची आहेस आणि आपली मैत्री मी कायम जपेन. माझी नेहमीच साथ दिल्याबद्दल, मला प्रोत्साहित केल्याबद्दल आणि एक अभिनेता, एक माणूस म्हणून मला घडण्यास मदत केल्याबद्दल तुझे खूप आभार. या वाढदिवशी मी तुला दोन टिप्स देणार आहे. सर्वांत पहिलं म्हणजे, भूतकाळ विसर कारण ते तू बदलू शकत नाहीस आणि दुसरं म्हणजे प्रेझेंट (भेटवस्तू) विसर, कारण मी तुला देऊ शकलो नाही. वाढदिवसाच्या शुभेच्छा', अशी पोस्ट आशुतोषने लिहिली आहे.

मालिकेच्या शूटिंगदरम्यान तेजश्री आणि आशुतोष यांच्यात खूप चांगली मैत्री झाली. दोघांच्या आवडीनिवडीसुद्धा सारख्याच असल्याने मैत्री करण्यासाठी त्यांना फार वेळ लागला नाही. मालिका सध्या बंद झाली असली तरी शुभ्रा आणि सोहमची जोडी प्रेक्षकांना अजूनही लक्षात आहे. आशुतोषच्या या पोस्टवर अनेकांनी कमेंट्स करत तेजश्रीला शुभेच्छा दिल्या आहेत.