'प्रेमळ आई बनली खाष्ट सासूबाई'; सोशल मीडियावर आसावरीच्या नवीन लूकची जोरदार चर्चा

झी मराठी वाहिनीवरील 'अग्गंबाई सासूबाई' या मालिकेने अल्पावधीतच प्रेक्षकांची मनं जिंकली. ही मालिका आता नव्या रुपात आणि नव्या नावाने प्रदर्शित झाली आहे. 'अग्गंबाई सूनबाई' असं या नवीन मालिकेचं नाव असून यातील काही भूमिकासुद्धा बदलल्या आहेत. ही नवीन मालिका सोमवारपासून (१५ मार्च) सुरू झाली. पहिल्या एपिसोडची उत्सुकता प्रेक्षकांमध्ये होतीच. मालिका प्रसारित होताच सोशल मीडियावर त्याविषयी कमेंट्स येऊ लागल्या होत्या. नव्या मालिकेत आसावरीची भूमिका पूर्णपणे बदलली आहे. आसावरीची भूमिका साकारणाऱ्या अभिनेत्री निवेदिता सराफ यांनी सोशल मीडियावर एक फोटो पोस्ट केला. या फोटोमध्ये त्यांचा मालिकेतील नवीन लूक पाहायला मिळत असून त्यावर चाहत्यांकडून कमेंट्स आणि लाईक्सचा वर्षाव होत आहे. मालिकेतील आसावरीची एंट्री खूपच छान होती, अशा शब्दांत काहींनी कौतुक केलंय. 

'अग्गंबाई सासूबाई' मालिकेत प्रेमळ आईची भूमिका साकारणारी आसावरी आता 'अग्गंबाई सूनबाई' मालिकेत खाष्ट सासूबाईंच्या भूमिकेत पाहायला मिळत आहे. निवेदिता यांनी पोस्ट केलेल्या या फोटोमध्ये त्यांनी गुलाबी रंगाच्या कुर्त्यावर हिरव्या रंगाचा कोट परिधान केला आहे. नेटकऱ्यांनी स्टाइलिश लूक अशी प्रतिक्रिया दिली आहे. या नवीन मालिकेत अभिजीत आणि आसावरी यांच्या भूमिकेत बराच बदल झालेला दिसतोय. तर शुभ्राच्या भूमिकेत अभिनेत्री तेजश्री प्रधानऐवजी उमा पेंढारकर दिसतेय. बबड्याची भूमिका साकारणाऱ्या आशुतोष पत्कीचीही मालिकेतून गच्छंती झाली आहे. आता मालिकेत बबड्याची भूमिका अभिनेता अद्वैत दादरकर साकारतोय. 

हेही वाचा : वीणासोबत ब्रेकअपच्या चर्चांना उधाण; शिव ठाकरे म्हणतो..

नवीन मालिकेत बरंच काही बदललं आहे. शुभ्रा आता बबडूची अर्थात तिच्या मुलाची काळजी घेण्यात मग्न झाली आहे. तर आसावरी पूर्ण कंपनीचा भार सांभाळत आहेत. अभिजीत राजे घर सांभाळण्यात शुभ्राची मदत करत आहेत. या नवीन कथेला आता प्रेक्षकांकडून कसा प्रतिसाद मिळतो हे पाहणं औत्सुक्याचं ठरणार आहे. मात्र पहिल्याच एपिसोडमध्ये निवेदिता सराफ यांनी प्रेक्षकांची मनं जिंकली हे नक्की!