सुशांतच्या कुटुंबाकडून अंकिता लोखंडेला मिळालं लग्नाचं 'हे' खास गिफ्ट

'पवित्र रिश्ता' या एकता कपूरच्या मालिकेतनं एक गोड हसरा चेहरा आपल्या भेटीस आला आणि भारताच्या घराघरात तो प्रत्येकाच्या आवडीचा बनला,तो म्हणजे अंकिता लोखंडेचा. मालिकेत तिनं साकारलेली 'अर्चना' ही भूमिका पाहून प्रत्येकाला वाटू लागलं मुलगी असावी तर अशी,बायको मिळावी तर अशी आणि सुनेच्या रुपात तिच्यासारखंच कुणीतरी यावं. 'पवित्र रिश्ता'नंतर अंकितानं फारसं काही काम केलं नसलं तरी मालिकेसोबतच दिवंगत सुशांत सिंग राजपुतची गर्लफ्रेंड म्हणूनही तिच्याभोवती कायम ग्लॅमरचं वर्तुळ असायचंच. पण सुशांत आणि तिचं ब्रेकअप झालं अनं मानवची ही अर्चना काही काळ इंडस्ट्रीतनं जणू गायब झाल्यासारखीच झाली. पुढे 'मणिकर्णिका' या सिनेमातनं तिनं बॉलीवूडमध्ये दमदार पदार्पण केलं.

आता कुठे करिअर मस्त सुरू झालं असं तिला वाटत असताना पुन्हा ज्या गोष्टीतनं स्वतःला सावरत तिनं आयुष्य मोठ्या उत्साहात सुरू केलं होतं त्याला दु:खाचा पुन्हा ब्रेक लागला. ते म्हणजे सुशांत सिंग राजपूतनं केलेली आत्महत्या. अंकिता-सुशांतमध्ये जे काही घडून गेलं होतं त्याचा जरादेखील विचार न करता अंकिता त्यावेळी सुशांतच्या कुटुंबासोबत उभी राहिली. त्यामुळे सुशांतचे कुंटुंबिय आणि अंकिता अधिक जवळ आले. अंकिताच्या अनेक पोस्टवर सुशांतच्या बहिणींनी केलेल्या सकारात्मक कमेंट्स याचा दाखला म्हणून घेता येतील. सुशांतसोबत ब्रेकअप झाल्यानंतर विकी जैन अंकिताच्या आयुष्यात आला अनं त्यानेच तिला पुन्हा आयुष्याच्या चांगल्या वळणावर आणून ठेवले असं तिनं बरेचदा सगळीकडे सांगितले आहे. आपल्या या बॉयफ्रेंडसोबत तिनं नुकतंच मुंबईत लग्न केलं आहे.

तिच्या लग्नाला अनेक कलाकारांनी म्हणजे जे तिचे खास आहेत अशांनी उपस्थिती दर्शवली होती. तर लग्नानंतर तिने जे आपले फोटो इन्स्टाग्रामवर पोस्ट केले त्यावरही अनेकांनी तिला शुभेच्छा दिल्या आहेत. यामध्ये एक शुभेच्छांची पोस्ट लक्ष वेधून घेतेय. ती म्हणजे सुशांत सिंग राजपूतची लहान बहिण श्वेताची. तिनं अंकिताला ''अभिनंदन,नवविवाहीत जोडप्याला खूप खूप शुभेच्छा. श्र्वेता''. असे लिहीले आहे. अंकितासाठी ही शुभेच्छा म्हणजे कुठल्याही महागड्या गिफ्टसाठी कमी नसेल एवढं मात्र नक्की.