लतादीदींच्या प्रकृतीविषयी आशा भोसले यांची प्रतिक्रिया | Asha Bhosle | Sakal
sakal

बोलून बातमी शोधा

Asha Bhosle, Lata Mangeshkar

लतादीदींच्या प्रकृतीविषयी आशा भोसले यांची प्रतिक्रिया

गानसम्राज्ञी लता मंगेशकर (Lata Mangeshkar) यांच्या प्रकृतीत सुधारणा होत असल्याची माहिती मुंबईतील ब्रीच कँडी रुग्णालयातील डॉक्टर प्रतीक समदानी यांनी दिली. लतादीदींना कोरोनाची लागण झाल्यानं त्यांना रुग्णालयात दाखल करण्यात आलं असून त्यांच्यावर आयसीयूमध्ये उपचार सुरू आहेत. लतादीदींना कोरोनाची सौम्य लक्षणं आहेत, मात्र त्यांचं वय ९२ वर्षे असल्याने त्यांना डॉक्टरांच्या देखरेखीखाली ठेवणं गरजेचं आहे. त्यामुळे त्यांना आयसीयूमध्ये दाखल करण्यात आलं आहे, अशी माहिती मंगेशकर कुटुंबीयांच्या वतीने देण्यात आली. लतादीदींची बहीण आणि ज्येष्ठ गायिका आशा भोसले (Asha Bhosle) यांनी पहिल्यांदाच प्रतिक्रिया दिली आहे.

'टाइम्स ऑफ इंडिया'शी बोलताना आशा भोसले म्हणाल्या, "मी त्यांना भेटायला गेले होते, पण रुग्णालयाच्या आत जाण्याची परवानगी मिळाली नाही. कोरोना महामारीमुळे कडक नियमांचं पालन करावं लागत आहे. पण दीदींच्या प्रकृतीत सुधारणा आहे. आधीपेक्षा त्या आता बऱ्या आहेत. उषा त्यांच्या संपर्कात असून व्हिडीओ कॉल्सद्वारे त्या आम्हाला लतादीदींच्या प्रकृतीविषयी माहिती देतात."

हेही वाचा: 'अशा घटनांना विरोध झालाच पाहिजे'; किरण मानेंच्या समर्थनार्थ उतरले नेटकरी

कोरोनातून बरं होण्यासाठी किमान सात दिवस लागतात, त्यामुळे लतादीदींना अजून रुग्णालयातच उपचार घ्यावे लागतील, असंही त्यांच्या कुटुंबीयांनी स्पष्ट केलं. ब्रीच कँडी रुग्णालयाचे डॉ. प्रतीक समदानी आणि त्यांचं पथक लतादीदींवर उपचार करत आहेत.

लतादीदींना कोविड न्युमोनिया झाला असून पुढील सात-आठ दिवस त्यांना रुग्णालयातच राहावं लागेल, असं डॉ. समदानी यांनी पत्रकारांना सांगितलं. लतादीदींना शनिवारपासूनच ब्रीच कँडी रुग्णालयात दाखल करण्यात आलं आहे. त्यांना कोरोनाची सौम्य लक्षणं असून ऑक्सिजनची गरज भासली नाही. त्यांचं वय पाहता डॉक्टरांच्या देखरेखीखाली त्यांच्यावर उपचार सुरू आहेत, अशी माहिती मुंबईच्या महापौर किशोरी पेडणेकर यांनी पत्रकार परिषदेत दिली.

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top