'बिग बॉस'च्या घरातून सोनालीची एग्झिट; चाहत्यांसह महेश मांजरेकरांनाही धक्का

बिग बॉस मराठी ३ (Bigg Boss Marathi 3) सध्या अंतिम टप्प्यात आलं असून रविवारी आणखी एका स्पर्धकाने या शोला निरोप दिला. यंदाच्या सीझनमधील लोकप्रिय स्पर्धक सोनाली पाटील (Sonali Patil) बिग बॉसच्या घरातून बाहेर पडली. जवळपास ९० हून अधिक दिवस सोनाली बिग बॉसच्या घरात होती आणि ग्रँड फिनालेमध्ये पोहोचणाऱ्या स्पर्धकांमध्ये तिचं नाव आवर्जून असेल असं अनेकांना वाटलं होतं. सोनालीच्या एलिमिनेशनमुळे सूत्रसंचालक महेश मांजरेकर यांना सुद्धा धक्का बसला. या सीझनमधील हे सर्वात धक्कादायक एलिमिनेशन असल्याचं मत मांजरेकर यांनी मांडलं.

भावूक झालेल्या सोनालीने घराबाहेर पडण्यापूर्वी इतर स्पर्धकांची भेट घेतली. यावेळी सर्वचजण भावूक झाले होते. महेश मांजरेकर यांनी शनिवारच्या चावडीत नॉमिनेट झालेल्या ४ स्पर्धकांसाठी ४ बॅग्स पाठवल्या होत्या. विकास पाटील, उत्कर्ष शिंदे, मीरा जगन्नाथ आणि सोनाली पाटील हे ४ स्पर्धक नॉमिनेट झाले होते. ज्या स्पर्धकाला त्याची बॅग परत मिळणार नाही तो घरातून बाहेर जाईल, असं मांजरेकर यांनी सांगितलं होतं. त्याप्रमाणे सोनालीला तिची बॅग परत मिळाली नाही आणि तिला घरातून बाहेर जावं लागलं.

सोनालीने बिग बॉस मराठीच्या घरात सुरुवातीपासूनच आपली वेगळी छाप सोडली होती. सोशल मीडियावर तिची नेहमी चर्चा असायची. कोल्हापुरी लहेजा आणि अफलातून नृत्य कौशल्य यांनी तिने चाहत्यांची मनं जिंकली होती. विशाल निकम आणि विकास पाटील यांच्यासोबतची तिची मैत्री आणि वाद नेहमीच प्रेक्षकांचं मनोरंजन करायचे.

बिग बॉस मराठी ३ मध्ये आता अंतिम ६ स्पर्धक राहिले आहेत. यामध्ये विशाल निकम, विकास पाटील, उत्कर्ष शिंदे, मीनल शाह, जय दुधाणे आणि मीरा जगन्नाथ यांचा समावेश आहे. या सहा जणांपैकी कोण बिग बॉसच्या ट्रॉफीवर आपलं नाव कोरेल, हे पाहणं औत्सुक्याचं ठरणार आहे.