Bigg Boss Marathi 4: पब्लिकच्या फोनवर फिरतोय सातारच्या बच्चनचा भावूक मेसेज..किरण माने म्हणाले,'जमेल तसं..'

Bigg Bos Marathi 4: बिग बॉस मराठी 4 चं पर्व आता संपत आलं आहे. येत्या रविवारी 8 जानेवारी रोजी बिग बॉस मराठीचा फिनाले पार पडतोय. शो ला त्यांचे टॉप 5 मिळाले आहेत- किरण माने, अपू्र्वा नेमळेकर, अक्षय केळकर,राखी सावंत,अमृता धोंगडे.

पण आता लगोलग कोण असतील टॉप ३ या चर्चेनंही सूर काढला आहे. अर्थात त्यावरनंही वेगवेगळे अंदाज लावले जात आहेत.

त्यादरम्यानच आता व्हायरल होत आहे किरण माने यांचे एक लेटर...का बरं झालाय सातारचा हा बच्चन इतका भावूक? चला जाणून घेऊया.(Bigg Boss Marathi 4: Kiran Mane Message To public...emotional note)

आता बिग बॉसच्या घरातला प्रत्येक मिनिट जसा उरलेल्या फायनलिस्टसाठी महत्त्वाचा आहे तितकाच तो घराबाहेरच्या त्यांच्या चाहत्यांसाठी पोटात गोळा आणणारा आहे. अनेकदा अशा रिअॅलिटी शो मध्ये प्रेक्षकवर्ग इतका गुंग होऊन जातो की या शो मध्ये घडणारे वाद, रुसवे-फुगवे,प्रेमाच्या गोष्टी त्यांना आपल्या आयुष्याचा एक भाग वाटतात अन् नकळत ते त्यावर व्यक्त होतात. आता किरण मानेंनी टॉप ५ मध्ये पोहोचल्यावर पब्लिकच्या नावे मेसेज रुपानं लिहिलेलं ते लेटर म्हणूनच त्यांचे चाहते अधिक व्हायरल करताना दिसत आहेत .

किरण मानेंनी त्या लेटर वजा मेसेजमध्ये लिहिले आहे की, ''नमस्कार,

कलर्स मराठी वाहिनीवरील सध्या सुरू असणाऱ्या, बिग बॉस मराठी सिजन ४ मध्ये आपले लाडक्या सातारच्या बच्चनची म्हणजेच किरण माने यांची एंट्री टॉप फाईव्ह मध्ये झालेली आहे. किरण माने त्यांच्या उत्कृष्ट खेळाच्या जोरावर आणि आपण दिलेल्या भरभरुन मतांमुळेच इथवर पोहचले आहेत. त्यामुळे सगळ्यात आधी सगळ्यांचे आभार..!''

''पण आपल्या प्रेमाची खरी कसोटी आता लागणार आहे. टॉप फाईव्ह मध्ये पोहचलेल्या आपल्या किरण माने यांना जिंकण्यासाठी आपल्याला आता वोटिंगचा पाऊस पाडायचा आहे. तेव्हा फक्त आपल्या स्वतःचा फोन वरून नाही तर आपले मित्र - परिवार, संस्था, मंडळ, शाळा, कॉलेज अगदी जमेल तिथे, जमेल तसं भरपूर मतदान करायचं आहे. आपल्या या वाघाच्या निडर खेळीमुळे तो इथवर आला आहे. तेव्हा आता आपल्या प्रेमामुळे आणि आपण केलेल्या वोटिंग मुळेच तो ट्रॉफी पर्यंत पोहचू शकतो. तेव्हा लावा ताकद..! आन होवून जाऊ दे... जाळ आन धूर संगटचं..!''