Bigg Boss 15: 'आधी तुझ्या बॉयफ्रेंडला सांभाळ'; तेजस्वीवर बिपाशा भडकली

Bigg Boss 15: 'बिग बॉस' हा छोट्या पडद्यावरील सर्वांत लोकप्रिय आणि तितकाच वादग्रस्त रिअॅलिटी शो आहे. सध्या बिग बॉसचा पंधरावा सिझन अंतिम टप्प्यात आला आहे. मात्र या घरातील स्पर्धकांची भांडणं दररोज नव्या रुपाने प्रेक्षकांसमोर येत आहेत. गेले काही दिवस अभिजीत बिचुकले आणि सलमान खान यांच्यातील वादानं अनेकांचं लक्ष वेधून घेतलं होतं. त्यानंतर आता शिल्पा शेट्टीची बहिण शमिता शेट्टी (Shamita Shetty) आणि तेजस्वी प्रकाशमध्ये (Tejasswi Prakash) 'तू तू मैं मै' झाली आहे. या वादादरम्यान तेजस्वी ही शमिताला आंटी म्हणाली. यावरून आता बॉलिवूड अभिनेत्री बिपाशा बासूने तेजस्वीवर टीका केली आहे. तेजस्वीने आधी तिचा बॉयफ्रेंड करण कुंद्रासोबतचे प्रश्न सोडवावेत आणि मग इतरांवर निशाणा साधावा, असं बिपाशा तिला म्हणाली. (Bipasha slams Tejasswi for calling Shamita shetty aunty)

बिपाशाने ट्विट करत याबद्दलची नाराजी व्यक्त केली. 'आधी वयावरून वाईट टिप्पणी करायची आणि नंतर माफी मागायची. हे कीव येण्यापलीकडचं आहे. ही मुलगी विजेती ठरेल असं कोणाला वाटत असेल किंवा ती कोणाची आदर्श असेल तर खरंच वाईट परिस्थिती आहे. जर तुला असुरक्षित वाटत असेल, तर इतरांवर खालच्या स्तराची टीका करण्याआधी तुझ्या बॉयफ्रेंडसोबतचे प्रश्न सोडव, जो तुझ्या मनात अशी भावना आणतोय', अशा शब्दांत बिपाशाने तेजस्वीला सुनावलं.

शमिता आणि तेजस्वीच्या भांडणाचे कारणही मोठे मजेशीर आहे. बिग बॉसनं सर्व स्पर्धकांना एक टास्क दिला होता. त्या दरम्यान तेजस्वी आणि शमिता यांच्यात वादाला सुरुवात झाली. त्याचं रुपांतर भांडणात झालं. त्यावेळी तेजस्वीनं रागाच्या भरात शमिताला आंटी अशी हाक मारली. ते शमिताला सहन झालं नाही आणि वाद सुरुच राहिला. सध्या सोशल मीडियावर त्याच्या काही क्लिप्स व्हायरल झाल्या आहेत.