'अभिनय सम्राट' अनंतात विलीन, शासकीय इतमामात अंत्यसंस्कार

मुंबई - ज्यांच्या अभिनयानं पाच दशकांहून अधिक काळ भारतीय प्रेक्षकांच्या मनावर अधिराज्य केले, त्या अभिनय सम्राट दिलीप कुमार (dilip kumar) हे अनंतात विलीन झाले आहे. त्यांचे जाणे सर्वसामान्य प्रेक्षकांपासून ते देशभरातील मोठमोठ्या सेलिब्रेटींसाठी वेदनादायी ठरले आहे. आपल्या आगळ्या वेगळ्या शैलीतील अभिनयानं दिलीप कुमार यांनी प्रेक्षकांना निखळ आनंद दिला. त्यांच्या जाण्यानं बॉलीवूडवर शोककळा पसरली आहे. त्यांना देशाचे पंतप्रधान नरेंद्र मोदी यांनी श्रद्धांजली वाहिली आहे. याशिवाय बॉलीवूडच्या अनेक सेलिब्रेटींनी देखील शोक व्यक्त करत त्यांच्याविषयीच्या आठवणींना उजाळा दिला आहे. ( bollywood dilip kumar passes away laid to rest with full state honours at Juhu Qabrastan)

दिलीप कुमार यांची बॉलीवूडमध्ये ट्रॅजिडी किंग अशी ओळख होती. त्यांच्या निधनाचे वृत्त कळताच बॉलीवूडमधील अनेक सेलिब्रेटींनी त्यांच्या घरी धाव घेतली. बुधवारी सायंकाळी दिलीप कुमार यांच्यावर शासकीय इतमामात अंत्यसंस्कार करण्यात आले. यावेळी चित्रपट, राजकीय, सामाजिक क्षेत्रातील मान्यवर उपस्थित होते. आपल्या आवडत्या अभिनेत्याचे शेवटचे दर्शन घ्यावे यासाठी त्यांच्या चाहत्यांनीही कुमार साहेबांच्या घराबाहेर गर्दी केल्याचे दिसून आले. त्यांना आवरताना पोलिसांना नाकी नऊ आले.

बुधवारी सकाळी साडेसातच्या सुमारास युसूफ खान अर्थात दिलीप कुमार यांची प्राणज्योत मालवली. ते 98 वर्षांचे होते. गेल्या काही दिवसांपासून दिलीप कुमार यांच्या प्रकृतीत बिघाड झाला होता. त्यांना उपचारासाठी हिंदूजा रुग्णालयात दाखल करण्यात आले होते. त्या उपचारानंतर त्यांच्या प्रकृतीत काही अंशी सुधारणाही झाली होती. ते घरीही परतले होते. मात्र पुन्हा काही दिवसांनी तब्येत बिघडली आणि त्यात त्यांचे निधन झाले.

जुहूमधील कब्रस्तानमध्ये त्यांच्यावर अंत्यसंस्कार करण्यात आले. त्या कब्रस्तानमध्ये त्यांचे पार्थिव दफन करण्यात आले. यावेळी त्यांच्या चाहत्यांनी मोठ्या संख्येनं गर्दी केली होती. शासकीय इतमामात त्यांच्यावर अंत्यसंस्कार करण्यात आले. दिलीप कुमार यांच्या निधनाची बातमी त्यांच्या परिवारातील एक सदस्य फैजल फारुखी यांनी ट्विट करुन दिली होती. ट्रॅजिडी किंग म्हणून प्रसिद्ध असणाऱ्या दिलीप कुमार यांनी 1944 मध्ये ज्वार भाटा नावाच्या चित्रपटापासून आपल्या करिअरला सुरुवात केली होती.