चित्रपटात काम देण्याच्या नावाखाली अभिनेत्रीचा विनयभंग; आरोपी अटकेत

बंगाली चित्रपटातील अभिनेत्रीला हिंदी चित्रपटात काम देण्याच्या नावाखाली तिचा विनयभंग करणाऱ्या एका कास्टिंग डायरेक्टरला मालाड (Malad) पोलिसांनी अटक केली. नवोदित अभिनेत्रींना हिंदी चित्रपटात काम देण्याचं आमिष दाखवून त्यांना मुंबईला बोलावून ऑडिशनच्या नावाखाली आरोपी त्यांचा विनयभंग करत असल्याचं तपासात समोर आलं. ओमप्रकाश तिवारी असं आरोपीचं नाव असून तो 24 वर्षांचा आहे. काही महिन्यांपूर्वी तो चित्रपटांशी संबंधित एका नामांकित कंपनीत काम करत होता. त्यावेळी त्याने फेसबुक अकाऊंटवर स्वत:ची ओळख कास्टिंग डायरेक्टर अशी लिहिली होती. नवोदित अभिनेत्रींना मोठमोठी आश्वासनं देऊन संबंधित आरोपी त्यांना आपल्या जाळ्यात ओढण्याचा प्रयत्न करायचा. अशाच प्रकारे तो बंगाली चित्रपटात काम करणाऱ्या एका अभिनेत्रीच्या संपर्कात आला.

डिसेंबर 2021 मध्ये या बंगाली अभिनेत्रीला तिवारीने ऑडिशनच्या नावाखाली मुंबईला बोलावलं. वेब सीरिज आणि चित्रपटांमध्ये काम देण्याच्या नावाखाली अभिनेत्रीला तोकडे कपडे घालून फोटोशूट करण्यास सांगितलं. हे करत असताना तिवारी अभिनेत्रीला वारंवार चुकीचा स्पर्श करत होता. यावर महिलेने आक्षेप घेतल्यानंतर दोघांमध्ये वाद झाला. या वादानंतर अभिनेत्रीने मालाड पोलीस ठाण्यात तक्रार दाखल केली.

आरोपीविरोधात मालाड पोलीस ठाण्यात 345 (अ),(ब),67(अ) अन्वये गुन्हा दाखल करण्यात आला. या प्रकरणी मालाड पोलिसांनी २४ तासांत आरोपीला अटक केली. आरोपीने अशा प्रकारे अनेक तरुणींची फसवणूक केल्याचा संशय पोलिसांना असून त्या अनुषंगाने पोलीस तपास करत आहेत.