esakal | प्रसिद्ध संगीतकार श्रवण राठोड यांचे कोरोनाने निधन

बोलून बातमी शोधा

popular music director shravan rathod
प्रसिद्ध संगीतकार श्रवण राठोड यांचे कोरोनाने निधन
sakal_logo
By
स्वाती वेमूल

साजन, दिवाना, आशिकी, दिल है मानता नही अशा अनेक हिंदी चित्रपटांना एकापेक्षा एक सुमधूर संगीत देणाऱ्या संगीतकार नदीम-श्रवण या जोडीपैकी श्रवणकुमार राठोड यांचे कोरोनाने निधन झाले. गेल्या काही दिवसांपासून रुग्णालयात त्यांच्यावर उपचार सुरू होते. त्यांची प्रकृती चिंताजनक होती. अखेर गुरुवारी रात्री त्यांनी अखेरचा श्वास घेतला. त्यांच्या पश्चात पत्नी आणि मुले असा परिवार आहे. नव्वदच्या दशकात नदीम-श्रवण ही जोडी कमालीची लोकप्रिय होती. त्यांनी कुमार सानू, उदित नारायण, अलका याज्ञिक, अनुराधा पौडवाल, अभिजीत, एस. पी. बालसुब्रमण्यम, सोनू निगम, कविता कृष्णमूर्ती, साधना सरगम यांसारख्या जवळजवळ सर्व आघाडीच्या गायकांना आपल्या चित्रपटांमध्ये संधी दिली.

'दंगल' या भोजपुरी चित्रपटापासून त्यांनी संगीतकार म्हणून सुरुवात केली. त्यानंतर हिंदीतील काही छोट्या चित्रपटांना त्यांनी संगीत दिले. मात्र महेश भट्ट यांच्या 'आशिकी' या चित्रपटानंतर त्यांना खूप लोकप्रियता मिळाली. या चित्रपटातील रोमँटिक गाणी चांगलीच गाजली. या संगीतकार जोडीने 'साजन', 'सडक', 'दिल है की मानता नही', 'साथी', 'दिवाना', 'फूल और काँटे', 'राजा हिंदुस्थानी', 'जान तेरे नाम', 'रंग', 'राजा', 'धडकन', 'परदेस', 'दिलवाले', 'राज' अशा अनेक सिनेमांसाठी संगीत दिग्दर्शन केले होते.