जॅकलिन फर्नांडिसच्या मागे ईडी; तब्बल पाच तास कसून चौकशी

नवी दिल्ली : अंमलबजावणी संचालनालयाने अर्थात ईडीने सध्या अनेकांची चौकशी सुरु केली आहे. यातच आता बॉलिवूडमधून मोठं नाव समोर येत आहे. मनी लाँड्रिंग प्रकरणात बॉलिवूड अभिनेत्री जॅकलिन फर्नांडिसची गेल्या पाच तासांपासून ईडी दिल्लीत चौकशी करत आहे. याबाबतचं वृत्त एएनआय या वृत्तसंस्थेनं दिलं आहे.

भूत पोलिस या तिच्या आगामी चित्रपटात सहकलाकार असणारी अभिनेत्री यामी गौतमला देखील ईडीने या वर्षाच्या सुरुवातीलाच समन्स बजावले होते. फेमा कायद्याअंतर्गत आर्थिक अनियमितेतप्रकरणी ही चौकशी करण्यात आली होती.

सूत्रांनी दिलेल्या माहितीनुसार, यामीच्या बँक खात्यात 1 कोटी रुपयांपेक्षा जास्त रक्कम परदेशी संस्थेकडून आली होती. मात्र, ही रक्कम स्विकारताना फेमा कायद्यातील नियमांचे पालन करण्यात आलेलं नव्हतं. म्हणूनच, बँकेने ईडीला या व्यवहाराबद्दल माहिती दिली होती.

सध्या यामी गौतम आणि जॅकलिन फर्नांडिस या दोघीही सैफ अली खान आणि अर्जुन कपूर यांच्यासमवेत 'भूत पोलिस' या आगामी हॉरर चित्रपटात दिसणार आहेत. हा चित्रपट १७ सप्टेंबर रोजी ओटीटी प्लॅटफॉर्मवर प्रदर्शित होणार आहे.