Gautami Patil : गौतमी पाटीलचा कार्यक्रम पडणार महागात, आयोजकांच्या खिशाला लागणार चौपट कात्री

गौतमी पाटीलच्या कार्यक्रमात गोंधळ, राडा होताना दिसून येतो मात्र राज्यभरातून तिला अफाट मागणी असताना आता मात्र तिचा कार्यक्रम आयोजित करणं आयोजकांना जवळपास चौपट महागात पडणार आहे. आयोजकांसह गौतमी आणि तिच्या चाहत्यांना देखील मोठा फटका बसण्याची शक्यता आहे.

गौतमीचा कार्यक्रम आणि चाहत्यांची हुल्लडबाजी, पोलिस, हाणामारी गौतमीच्या कार्यक्रमांच समीकरणच झालं आहे. यात कधी प्रेक्षकांमध्ये हाणामारी होते तर कधी पोलिसांना हुल्लडबाजांवर लाठीचार्ज करतात. अशातच नाशिकमध्ये हुल्लडबाजांचा फटका प्रसारमाध्यमांच्या कॅमेरामॅनलाही बसला. यामुळेच आता पोलिसांनी गौतमीच्या कार्यक्रमांना सर्व परवानग्यासोबत पेड पोलीस बंदोबस्त देण्यास सुरुवात केली आहे. मात्र, याच पेड बंदोबस्तामुळे आयोजकांच्या खिशाला जवळपास चौपट कात्री लागणार आहे.

पेड पोलीस बंदोबस्ताची सुरुवात सांगोला तालुक्यातील घेरडी या गावातील कार्यक्रमापासून सुरु झाल्याने या आयोजकांना 100 पोलीस कर्मचारी आणि सहा अधिकाऱ्यांच्या बंदोबस्तासाठी तब्बल सव्वा पाच लाख रुपये भरून गौतमीचा कार्यक्रम ठेवावा लागला असल्याचं समोर आलं आहे.

मात्र यामुळे गौतमीचा कार्यक्रम शांततेत पार पडल्याचं आयोजकांनी सांगितलं आहे. घेरडी येथे रासपचे नेते आबा मोठे यांच्या वाढदिवसासाठी गौतमीच्या कार्यक्रमाचे आयोजन करण्यात आलं होतं. आबा मोठे यांना शुभेच्छा देण्यासाठी रासपचे अध्यक्ष महादेव जानकर हे देखील उपस्थित होते.

दरम्यान, आता गौतमीच्या मानधनाच्या दुपटीपेक्षाही जास्त रक्कम केवळ पोलीस बंदोबस्तासाठी भरावी लागणार असल्याने सर्वच आयोजकांना एवढा खर्च करणे कितपत शक्य आहे याची जाणीव गौतमीला देखील आहे. त्यामुळेच तुम्ही कार्यक्रमासाठी दुरून येत तर शांतपणे कार्यक्रम पाहा आणि आनंद घ्या गोंधळ करू नका, असं आवाहन गौतमीने आपल्या चाहत्यांना केले आहे.