'हॅरी पॉटर' फेम एमा वॉटसनचा साखरपुडा? पाहा काय म्हणतेय अभिनेत्री..

'हॅरी पॉटर' Harry Potter या जगप्रसिद्ध चित्रपटांच्या सीरिजमध्ये हर्माईनीची भूमिका साकारणारी अभिनेत्री एमा वॉटसनच्या Emma Watson साखरपुड्याची सध्या चर्चा आहे. ३१ वर्षीय एमाच्या साखरपुड्यासोबतच तिचं करिअर संपुष्टात येत असल्याचंही म्हटलं जातंय. या सर्व चर्चांवर आता खुद्द एमानेच मौन सोडलं आहे. एमाने ट्विट करत या चर्चांना पूर्णविराम दिला आहे. 'प्रिय चाहत्यांनो, माझ्या साखरपुड्यासंदर्भात असो किंवा माझ्या करिअरसंदर्भात, अशा अफवा फक्त क्लिक्स मिळवण्यासाठी पसरवल्या जातात', अशा शब्दांत तिने उत्तर दिलं. (Harry Potter Star Emma Watson Addresses Engagement Rumours And Dormant Career)

एमाने तिच्या साखरपुड्याच्या वृत्तांसंदर्भात आणखी एक ट्विट केलं. 'माझ्याकडे खरंच जर आनंदाची बातमी असेल, तर मी नक्की तुम्हाला सांगेन', असं ती म्हणाली. 'सध्या मी इतरांप्रमाणेच घरी वेळ घालवत आहे. ब्रेड बनवण्याचा अयशस्वी प्रयत्न करतेय, माझ्या कुटुंबीयांची काळजी घेतेय आणि कोरोना विषाणू परसू नये यासाठी प्रयत्न करतेय. सध्याच्या कठीण काळात तुम्हीसुद्धा सुरक्षित राहा आणि काळजी घ्या', असं तिने आणखी एका ट्विटमध्ये म्हटलं.

एमाच्या साखरपुड्याच्या चर्चांमागचं कारण-

एमाच्या एका फोटोमध्ये तिच्या हातात साखरपुड्याची अंगठी पाहायला मिळाल्याने सोशल मीडियावर चर्चांना उधाण आलं. हा फोटो तिचा बॉयफ्रेंड लिओ रॉबिन्टनसोबतचा होता. ऑक्टोबर २०१९ मध्ये एमा आणि रॉबिन्टचा किस करतानाचा फोटो व्हायरल झाला होता. मात्र आम्ही दोघं फक्त चांगले मित्र आहोत, असं एमा सुरुवातीला म्हणाली होती. तिसाव्या वाढदिवसानिमित्त दिलेल्या एका मुलाखतीत तिने रॉबिन्टनला डेट करत असल्याचा खुलासा केला.