Hrudayi Preet Jagate: हृदयी प्रीत जागते.. झी मराठी घेऊन येतेय संगीतमय प्रेमकथा

zee marathi: सध्या मालिका विश्वात प्रचंड तगडी स्पर्धा असून काय नवीन संकल्पना आणि आशय [प्रेक्षकांना देता येईल, यासाठी वाहिन्यांमध्ये रस्सीखेच सुरू आहे. अशातच सध्या संगीतमय मालिकांचे वारे वाहू लागले आहेत. झी मराठी वाहिनीने देखील एक अनोखी संगीतमय प्रेमकथा प्रेक्षकांच्या भेटीला आणली आहे. नुकताच या मालिकेचा ट्रेलर लॉंच झाला असून प्रेक्षकांमध्ये प्रचंड उत्सुकता आहे.

(Hrudayi Preet Jagate zee marathi new serial telecast on 7 november 2022)

'हृदयी प्रीत जागते'असे या मालिकेचे नाव असून ही मालिका एक तरुण संगीतमय प्रेमकथा आहे. ही कथा दोन तरुणांची आहे जे एकाच नाण्याच्या दोन बाजू आहेत. ह्या मालिकेतील नायिका एक निस्वार्थी, प्रामाणिक आणि आज्ञाधारक मुलगी आहे जी एका नम्र कुटुंबातील आहे. तर नायक प्रचंड हुशार, मोहक मुलगा आहे आणि त्याला पाश्चिमात्य संगीताची आवड आहे. हे दोघेही त्यांच्या स्वभावात आणि जीवनशैलीत वेगळे ध्रुव आहेत पण संगीत हा त्यांच्यातील एकमेव समान धागा आहे.

नायिका कीर्तन गायिका आहे आणि त्यांच्या घरात कीर्तनाची परंपरा आहे. तर नायक रॉक बँड परफॉर्मर आहे. ही भिन्नता असूनसुद्धा दोघांचंही संगीतावर जीवापाड प्रेम आहे. आता हेच संगीत ह्या दोन आत्म्यांना कसं एकत्र आणते हे बघणं प्रेक्षकांसाठी औत्सुक्याचं असणार आहे.

सिद्धार्थ खिरीद आणि पूजा कातुर्डे ही तरुण जोडी ह्या मालिकेच्या निमित्ताने प्रथमच मुख्य भूमिकेत दिसणार आहे. ह्या मालिकेचे लेखन केलं आहे अभिजीत शेंडे यांनी, तर झी मराठीवर अनेक सुपरहिट मालिका देणारे दिग्दर्शक मंदार देवस्थळी यांनी या मालिकेचं दिग्दर्शन केलं आहे. या मालिकेची निर्मिती केली आहे राजेश जोशी यांनी. ७ नोव्हेंबरपासून ही मालिका सुरू होणार आहे.