मराठी मालिकेतील ग्रँड प्रपोजल; 'मन उडू उडू झालं'चा खास एपिसोड

झी मराठी वाहिनीवरील 'मन उडू उडू झालं' (Man Udu Udu Zala) या मालिकेने प्रेक्षकांची मनं जिंकली आहेत. ही मालिका अल्पावधीत त्यांची आवडती बनली असून त्यातील व्यक्तिरेखा देखील प्रेक्षकांना आपल्याशा वाटतात. मालिकेचं कथानक आणि इंद्रा दिपूची जोडी याला प्रेक्षकांनी पसंती दर्शवली आहे. नुकतंच प्रेक्षकांनी मालिकेत पाहिलं की सानिका आणि कार्तिकच्या नात्याला देशपांडे सरांचा विरोध असल्यामुळे ते सानिकाचं एका चांगल्या मुलासोबत लग्न लावून द्यायचं ठरवतात आणि तिच्यासाठी इंद्रजित साळगावकरच स्थळ सुचवतात.

एकीकडे इंद्रा दिपूचा होकार मिळवण्यासाठी झुरतोय तर दुसरीकडे दिपू त्याला देशपांडे सरांचं ऐकून सानिकाशी लग्न करायला भाग पडतेय. पण इंद्रा हार मानणाऱ्यातला नाही. त्यामुळे त्याने दिपूचा होकार मिळवण्याचं मनाशी पक्क केलं आहे. इंद्रा स्टाईलमध्ये तो जेव्हा गोष्टी करतो तेव्हा त्या खूप ग्रँड असतात. त्यामुळे इंद्रा जेव्हा दिपूला प्रपोज करेल तो क्षण किती ग्रँड असेल याची प्रेक्षक कल्पनासुद्धा करू शकत नाहीत. इंद्रा दिपूला चक्क आकाशाला गवसणी घालत प्रपोज करणार आहे.

इंद्रा दिपूला हॉट एअर बलूनमध्ये प्रपोज करणार आहे. हा प्रसंग चित्रित करताना इंद्रा आणि दिपूने आकाशाला गवसणी घालत १५० फुटावर चित्रीकरण केलं. आजपर्यंत कुठल्याच मराठी मालिकेत इतका ग्रँड सीन शूट झाला नाहीये. इंद्राने इतक्या अनोख्या पद्धतीने प्रपोज केल्यावर दिपू त्याला होकार देईल का, दिपू इंद्राच्या प्रेमाचा स्वीकार करून त्याची साथ देईल का, हे प्रेक्षकांना पुढील आठवड्यात पाहायला मिळेल. इंद्रा आणि दिपू यांच्या आयुष्यातील हा खास व महत्वाचा क्षण प्रेक्षकांना मंगळवारी २५ जानेवारी रोजी संध्याकाळी ७.३० वाजता झी मराठी वाहिनीवर पहायला मिळेल.